Փաստ ինֆո

Քաղտեխնոլոգ Արմեն Բադալյանի գնահատմամբ՝ ներկայիս քաղաքական համակարգի էությունն ու ոգին ոչնչով չի տարբերվում մինչև 2018թ-ի ապրիլ-մայիս իրադարձությունները կառավարած քաղաքական համակարգի էությունից, ոգուց ու որակից։ 

«Ճիշտ է՝ նախկինում ընդդիմության նկատմամբ բռնություն չէր կիրառվում, սակայն բավականին բացասական էին վերաբերվում, նույնը տեղի է ունենում հիմա։ Կառավարման համակարգն ինչպես նախկինում էր անհանդուրժող, ցինիկ, ընդդիմության առաջարկները մերժում էր, նույնն էլ հիմա է, քանի որ այս երկու կառավարման համակարգերի էությունները չեն փոխվել»,-այս մասին այսօր «Փաստինֆո»-ի հետ զրույցում ասաց քաղտեխնոլոգը։

Նա հիշեցրեց, որ վերջին անգամ խորհրդարանում ծեծկռտուք էր տեղի ունեցել 1996թ-ին՝ ՀՀՇ-ի կառավարման ժամանակ, և քանի որ ներկա իշխանական համակարգը շատ են կապում ՀՀՇ-ի հետ, կարելի է ասել, որ հին, «բարի» ավանդույթները շարունակվում են։

Քաղտեխնոլոգը շեշտեց, որ այսօր կառավարման համակարգը փոխվել է, Սահմանադրությունը փոխվել է, անձինք փոխվել են, բայց քանի որ սուպերվարչապետական համակարգը պահպանվել է և պահպանվել է նաև ավտորիտար կառավարման մենթալիտետը (այս մասին ասել էր նաև Freedom house-ը), ապա տրամաբանական է, որ նախկինում եղած երևույթները պետք է կրկնվեին։

Դիտարկմանը՝ ԱԺ «Լուսավոր Հայաստան» խմբակցության ղեկավար Էդմոն Մարուքյանը երեկ ֆեյսբուքյան ուղիղ եթերում ասել էր, թե ինքը վարչապետի հետ հանդիպման ժամանակ հայտնել է, որ իրենց պատկերացնում են հաջորդ իշխանություն, հնարավո՞ր է ծեծկռտուքը նաև ԼՀԿ-ի վարկանիշն իջեցնելու միտում ուներ, Բադալյանը պատասխանեց. «Չեմ կարծում, քանի որ «Լուսավոր Հայաստանի» վարկանիշն այնքան ցածր է, որ ավելի ցածրացնելու տեղ չկա։ Ինչպես վարչապետի վարկանիշի դեպքում է, ԼՀԿ-ի վարկանիշը նույնպես խորհրդարան մտնելուց հետո անկում է ապրել։ Անկախ նրանից ԼՀԿ-ն կասի ապագա իշխանություն է, թե ոչ, միևնույն է մենք կարող ենք վստահաբար ասել, որ ինքը հաստատ ապագա իշխանությունը չէ»։

Նա ընդգծեց՝ ավելի հավանական է, որ ապագա իշխանություն կարող է լինել Արթուր Վանեցյանը, քան ԼՀԿ-ն։

«Եթե Հայաստանում ոչ մի կուսակցություն չմնա, միայն «Լուսավոր Հայաստանը» լինի, այդ դեպքում կարող են իշխանության գալ, հակառակ դեպքում մոռացեք, որ կարող է նման բան լինել։ ԼՀԿ-ն այն վարկանիշը չունի ու այն թիմը չէ, որ ապագա իշխանություն լինի»,-ամփոփելով խոսքն ասաց քաղտեխնոլոգը։

Հեղինակ՝ Սոնա Գեւորգյան

Աղբյուր` Փաստինֆո