Փաստ ինֆո

Որևէ մեկը կասկած ունե՞ր, թե Սասուն Միքայելյանն, ասենք, իր տեսակով տարբեր է նորանկախ Հայաստանի պառլամենտարիզմի պատմության մեջ ամենախայտառակ դրսևորումներ ունեցած մականունավորներից: 

Երբ 2007-ին լեդի Հակոբը Ազգային ժողովում՝ հեղափոխական տերմինաբանությամբ ասած՝ «բոլոլա» սարքեց՝ Սասուն Միքայելյանը կանգնած նայում էր: Երևի այսօր այդ օրերի կարոտախտն արդեն խեղդել էր, չդիմացավ: Լավ էր՝ Քոչարյան Անդրանիկը ջրի շիշը ձեռքից առավ, թե չէ՝ այն էլ ամբիոնի ուղղությամբ էր գնալու:

Որևէ մեկը կասկած ուներ՞, թե Նիկոլ Փաշինյանը չգիտեր՝ հանձինս Սասուն Միքայելյանի ում է տանում խորհրդարան: Այսօր արդեն՝ վստահ եմ, չունեն:
Փոխարինիչներ միշտ էլ կան, գտնվում են, այնպես որ՝ էլ երբեք չասեք, թե՝ խորհրդարանում չկան այլևս շմայսանմաններ: Կան, ընդ որում առաջին շարքում:
Այսօր, Շուշիի հաղթանակի օրը մենք ականատես եղանք պառլամենտարիզմի վախճանին՝ պառլամենտական երկրում, թավշյա, ոչ բռնի հեղափոխությունից հետո:

Շուշիի ազատագրման 28-րդ տարեդարձի օրը: Պատահակա՞ն էր, որ օրը մխտռեց Սասուն Միքայելյանը: Կարծում եմ՝ ոչ: Ժամանակին պատերազմի բովով անցածի համարում ունեցող /համենայնդեպս, այդպիսի տեսակետներ կան/ Միքայելյանը չէ՞ր, որ թավշյա հեղափոխության հաղթանակը գերադասում էր Արցախյան ազատամարտից:

Եվ ուրեմն, պատահական չէ, որ այսօր Շուշիի ազատագրման օրը նա ծեծկռտուք սկսեց ԱԺ-ում: Թավշյա հեղափոխականը հաղթեզ արցախյան պատերազմի մասնակցին, հակառակ պարագայում նշանային այս օրը նա բոլորովին այլ դիրքում պիտի լիներ:

Ի դեպ, մինչ այդ սկսված լեզվակռիվն էլ պակաս տգեղ ու տհաճ չէր, բայց դա ներկա պառլամենտի համար ամենօրյա ռեժիմ է արդեն: Եվ պարզվում է, որ այս ամենը տեղի է ունեցել վարչապետի ներկայությամբ:
Շուշիի ազատագրման օրը մխտռելը այ այսպես է լինում:

Հ.Գ. Թե ինչ ընթացք կտա Էդմոն Մարուքյանն իր հանդեպ առաջինը բռնի ուժ կիրառած Սասուն Միքայելյանին, չենք կարող ասել, սակայն, երկրի վարչապետի ներկայությամբ իր իսկ ղեկավարած քաղաքական ուժի պատգամավորների նման վարքագիծը, անհարգալից վերաբերմունքը, իսկապես, որ խորհելու լուրջ առիթ է տալիս …

Հեղինակ՝ Արթուր Գահնապետյան

Աղբյուր` Փաստինֆո