Փաստ ինֆո

«Եթե մենք Սահմանադրության 1-ին հոդվածով ամրագրված իրավական պետություն ենք եւ մեր կողմից կայացված որոշումների նկատմամբ հարգանք չունենք, մենք մեր պետական ինստիտուտները ուղղակի կարժեզրկենք: Անկախ նրանից, թե հանրության առջեւ ինչ սոցիալ-տնտեսական խնդիրներ են, հանրաքվեն նշանակված է»,-«Փաստինֆո»-ի հետ զրույցում ասաց փաստաբան Նորայր Նորիկյանը՝ անդրադառնալով սահմանադրական հանրաքվեի անցկացման խնդրին ու այդ համատեքստում կորոնավիրուսով պայմանավորված՝ արտակարգ դրության ժամկետի երկարացման հնարավորությանը:

Փաստաբանն ասաց՝ չի մտնում սահմանադրական հանրաքվեի իրավաքաղաքական նրբությունների մեջ, թե որքանով է այն իրավաչափ, որքանով է համապատասխանում Սահմանադրության պահանջներին, հանրաքվեն նշանակված է եւ արտակարգ դրության ավարտից հետո սահմանված ժամկետներում ԿԸՀ-ն եւ մյուս պետական ինստիտուտները պարտավոր են անցկացնել հանրաքվե:

Նշենք, որ լրատվամիջոցների փոխանցմամբ, այս օրերին իշխանությունը քննարկում է մայիսի 14-ից արտակարգ դրությունը երկարացնելու հարցը, ինչը հենց սահմանադրական հանրաքվեով է պայմանավորված, քանի որ այն չեղարկելու տարբերակ իշխանությունը չունի, իսկ արտակարգ դրության պայմաններում հանրաքվե չի կարող իրականացվել: Մի կողմից կորոնավիրուսի վտանգն է, մյուս կողմից՝ քաղաքական խնդիր կա՝ ստեղծված սոցիալ-տնտեսական ծանր իրավիճակում ՍԴ գործող կազմից ազատվելու հարցով հանրաքվեն կարող է տապալվել:

«Կներեք, հանրությունն այսօր ուզում է լավ ապրել, իր կյանքի որակը փոխել,ուզում է գործարաններն աշխատեն, սրանք իրավաչափ պահանջներ են: Մենք պետք է գիտակցենք, որ սա հանրության օրակարգով չէ պայմանավորված, բնականաբար, հանրությունը իր վերաբերմունքը ցույց կտա՝ կգնա՞ տեղամասեր, «այո՞» կասի հանրաքվեին, դա կլինի նրա վերաբերմունքը այն օրակարգին, որը առաջադրվում է քաղաքական համակարգի կողմից»,-մեզ հետ զրույցում ասաց Նորայր Նորիկյանը:

Հարցին, արդյո՞ք քաղաքական իշխանությունը կարող է օգտագործել ստեղծված իրավիճակը եւ արտակարգ դրությունը երկարացնել՝ հանրաքվեի՝ իր համար անցանկալի ելքի հնարավորությամբ պայմանավորված, Նորայր Նորիկյանն ասաց. «Կարծում եմ, այնուամենայնիվ, քաղաքական իշխանությունը մտավախություն ունի, որ կորոնավիրուսով պայմանավորված մենք հայտնվել ենք մի նոր իրավիճակում, որը օբյեկտիվ դժգոհություններ ու դժվարություններ է ստեղծել հանրության կյանքում եւ հանրությունը կարող է հանրաքվեի կամ ՍԴ –ի շուրջ ստեղծված իրավիճակը ստորադասել առավել կարեւոր խնդիրներին , որի հետեւանքով կարող է վտանգի տակ դրվել հանրաքվեի արդյունքը քաղաքական իշխանության պատկերացմամբ , այսինքն, հանրաքվեի արդյունքները կարող են չարտացոլել այն իրական տրամադրությունները, որոնք հանրությունն ունի ՍԴ-ի նկատմամբ, բայց հաշվի առնելով այս իրողությունները, բնականաբար, հասարակական տրամադրությունների փոփոխություններն ակնհայտ են լինելու այս առումով»:

Ինչ վերաբերվում է արտակարգ դրությունը երկարացնելու իրավական կարգավորումներին, փաստաբանի խոսքով, Սահմանադրությունը եւ Արտակարգ դրության իրավական ռեժիմի մասին ՀՀ օրենքի իրավակարգավորումները հնարավորություն են տալիս դա անել, եթե արտակարգ դրության հայտարարման համար հիմք հանդիսացող պատճառները չեն վերացել: Այս տեսանկյունից՝ կարելի է-չի կարելի դիսկուրսն, ըստ նրա, արհեստական է:

«Եթե մայիսի 14-ից հետո որոշում կայացվի երկարացնել արտակարգ դրությունը, բնականաբար, հանրաքվե տեղի չի ունենա, այն տեղի կունենա միայն արտակարգ դրության ժամկետը լրանալուց հետո 50-րդ օրը: Կառավարությունը կներկայացնի հիմնավորումներ, կտեսնենք այդ հիմնավորումները եւ դիրքորոշում կհայտնենք, բայց ես ուզում եմ արձանագրել, որ ես ի սկզբանե, դեմ եմ եղել արտակարգ դրության հայտարարմանը՝ ունենալով այն համոզմունքը , որ Արտակարգ իրավիճակում բնակչության պաշտպանության մասին ՀՀ օրենքը լիակատար հնարավորություն էր տալիս այս համաճարակը կառավարելիության տակ պահել եւ համապատասխան օջախներում աղետի գոտի հայտարարել ու իրավիճակը վերահսկելի»,-ասաց Նորայր Նորիկյանը:

Ինչ վերաբերում է առհասարակ, արտակարգ դրությանը, Նորայր Նորիկյանի կարծիքով, եթե պարետի ցուցումները չեն կատարվում, անձանց տեղաշարժի սահմանափակումները չեն կատարվում, գրոշի արժեք չունի արտակարգ դրությունը:

Հարգանքով վերաբերվելով առողջապահության նախարարի գնահատականներին, փաստաբանը նշում է, որ իր կարծիքով համաշխարհային վիճակագրական տվյալները «բլեֆ» են եւ արժանահավատ լինել չեն կարող. «Հնարավոր չէ , որ Ֆրանսիայում եւ Գերմանիայում վարակվածների նույն պատկերը լինի, բայց մահացության թվերը էականորեն տարբերվեն կամ Չինաստանում, որը վարակածին երկիրն էր ու ընդամենը 86 հազար վարակակիր ունի եւ 3-4 հազար մահ , իսկ ԱՄՆ-ում 1.5 միլիոն վարակակիր կա: Այդ վիճակագրական բլեֆին ես չեմ հավատացել, նաեւ չեմ հավատացել Հայաստանի ու Ադրբեջանի թվերին եւ Վրաստանի թվերին: Ես բացառում եմ, որ մենք նույն աշխարհագրական տարածքում ենք, նույն վարակի հատվածում ենք, Վրաստանում կարող էր այդքան քիչ լինել, Հայաստանում, այդքան շատ, եթե վարակը նույն պարամետրերն ունի, խոցելի խմբերը նույնն են: Ի՞նչ է, մեր 65 տարեկանից բարձր քաղաքացիները պակա՞ս իմունիտետ ունեն»,-եզրափակեց Նորայր Նորիկյանը՝ հավելելով, որ ինչ-որ բան այն չէ, բայց բնականաբար, բժշկական տեսանկյունից, մասնագիտական գնահատական տալ ինքը չի կարող:

Աղբյուր` Փաստինֆո