Փաստ ինֆո

Փորձեցին մեղադրել, որ նույնիսկ կալանավորված վիճակում ես դուրս եմ անում սենյակից քրեակատարողականի աշխատողներին և սա նույն դեպքն է, երբ մարդն ընդհանրապես չհասկանալով, թե ինչի մասին է խոսքը, իրեն իրավունք է վերապահում իմ հասցեին նման մեղադրանքներ հնչեցնել։ Այս մասին ՀՀ երկրորդ նախագահի և մյուսների գործով դատական նիստին ասել է ՀՀ երկրորդ նախագահ Ռոբերտ Քոչարյանը։

«Այո, այդպիսի դեպք եղել է, բայց ես պատմեմ դա ոնց է եղել։ Ես բժիշկների հետ նստած քննարկում էի՝ վիրահատություն ինչպես պետք է անել և ՔԿՀ ոչ «Երևան-Կենտրոն»-ի, վարչությունից մի բարձրաստիճան սպա նստել ասում է՝ ես էլ եմ մասնակցում եմ։ Հարցնում եմ՝ բժիշկ եք, ասում է՝ ոչ։ Որպես ով եք այդ դեպքում Դուք մասնակցում տվյալ դեպքում վիրահատության քննարկմանը։ Ասում է՝ ես պետք է մասնակցեմ, այդպիսի հրաման ունեմ։ Ասել եմ՝ խնդրում եմ զանգեք ՄԻՊ-ին, ասում է՝ չեմ զանգում։ Ասում եմ՝ ես հեռախոս չունեմ, ինձ զրկել եք կապի հնարավորությունից։ Այլ ելք չկար, ես կանգնեցի և ասացի՝ես հրաժարվում եմ այս բուժումից, հետ ինձ տարեք ՔԿՀ, որովհետև դուք իրավունք չունեք ներկա լինել նման խոսակցության »,- ասաց Ռոբերտ Քոչարյանը՝ հավելելով, որ դրանից հետո բժիշկների հետ հանդիպման ժամանակ պնդում էր, որ ոչ ոք ներսում չլինի։

Ռոբերտ Քոչարյանը նշեց, որ իր իրավունքները ոտնահարվել են շատ կոպիտ, գռեհիկ ձևով և ինքն իր իրավունքներն է պաշտպանել՝ թեկուզ դա պետք է աներ դատախազությունը։

Անդրադառնալով անձնական երաշխավորություն ներկայացնող նախկին վարչապետների հասցեին հնչեցված գնահատականներին, Քոչարյանն ասաց, որ ինչ-որ դեղին մամուլում հրապարակված հոդվածը ներկայացնում են որպես հիմք և փորձում են վարկաբեկել մի մարդու, ով 10 տարի եղել է Արցախի վարչապետ։

«Այդ աստիճանի ցինիզմի հասնել ուղղակի չի կարելի։ Միայն այն պատճառով, որ տվյալ դեպքում փորձում են ինչ-որ վնաս հասցնել ինձ և վարկաբեկել մարդկանց, ովքեր մեծ ավանդ ունեն ՀՀ կառուցման գործում։ Իմ պատկերացումների մեջ չի տեղավորվում նման վարքագիծ»,- ասաց Քոչարյանը։

Ինչ վերաբերում է երաշխավորողների ազդեցությանը, Քոչարյանն ասաց, որ ինքը ՀՀ և ԱՀ նախագահն է և ամենամեծ զսպող հանգամանքը հենց դա է։

«Ինձ՝ Արցախի հերոսին և երկու հայկական հանրապետությունների նախագահին երաշխավորում են մարդիկ և հանկարծ ես մի քայլ եմ անում, որն ուղղակի իմ հեղինակությունը զրոյի է հասցնում։ Ցավալի է շատ, որ մեր դատախազները այդքանը չեն հասկանում, որ ամենամեծ զսպող հանգամանքը դա է, որ որևէ մեկը երաշխավորություն է ներկայացնում և դու խաչ ես քաշում քո կենսագրության վրա, խաչն ես քաշում այն հանգամանքի վրա, որ ինչ-որ ճանապարհ ես անցել, առաջին դեմք ես եղել և այդ պատճառով դու կկորցնես բոլոր ընկերներին»,- ասաց Քոչարյանը՝ հավելելով, որ խոսքը միայն երաշխավորողների մասին չէ, այլ հարցը հենց ինքդ քո մեջ է։

«Դու, կոպիտ ասած, այդ մարդկանց պադստավկա անող մա՞րդ ես, թե այն մարդն ես, որ այդ մարդկանց խոսք ես տալիս և քո խոսքին տեր ես կանգնում։ Նույնիսկ իմ պարագայում, իմ կենսագրությունը հաշվի առնելով, տիկին Դանիբեկյան ես սպասում եմ, որ Դուք ինձ պետք է հարցնեք՝ Դուք խոսք եք տալիս, որ նման երևույթներ չի լինի ու, եթե ես ասեմ՝ այո, ես Ձեզ խոսք եմ տալիս, հանգիստ կարող եք որոշում կայացնել՝ առանց որևէ երաշխավորանքի, առանց գրավի, առանց ամեն ինչի, վստահ լինելով, որ ես երբեք այդ հատկապես հրապարակային տված խոսքը երբեք չեմ դրժի։ Ցավալի է ինձ համար, որ ոչ Դուք, ոչ դատախազները չեն ուզում դա հասկանալ»,- ասաց Քոչարյանը։

Աղբյուր` Փաստինֆո