Փաստ ինֆո

Սույն գործով կալանքի հիմքը գործի քննությանը խոչընդոտելու ռիսկն է, որի չեզոքացման մասին խոսք լինել չի կարող։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց մեղադրող դատախազ Գևորգ Բաղդասարյանը՝ պահանջելով մերժել Ռոբերտ Քոչարյանի խափանման միջոցը փոխելու համար ներկայացված բոլոր երեք միջնորդությունները։

Նրա խոսքով՝ արձանագրվել է վկաների վրա ներգործության ռիսկ և որևէ դատական նիստում որևէ դատավարական գործողություն չի եղել, որը կարող էր նվազեցնել ռիսկը, որևէ վկա չի հարցաքննվել, որևէ ցուցմունք չի հրապարակվել։ Բաղդասարյանը նշեց, որ կալանքի տակ գտնվելու ժամկետը չի կարող քննարկվել ապրիորի, վերացական և նշել ամսաթվերով, թե ինչքան է անցել, ժամանակն անցել է և որևէ մեկը չի կարող կանգնեցնել ժամանակը, որքան էլ անհիմն ու կրկնվող միջնորդություններ ներկայացնի պաշտպանության կողմը։

Նրա խոսքով՝ խափանման միջոց կալանավորումը կիրառվել է՝ գործի քննության վրա ազդեցությունը չեզոքացնելու նպատակով և այդ նպատակը չի իրացվել մի պարզ պատճառով՝ մեղադրող կողմը հնարավորություն չի ունենում հրապարակել մեղադրական եզրակացությունը։

Բաղդասարյանը խնդրեց դատարանին մերժել միջնորդությունները՝ անհիմն լինելու պատճառաբանությամբ։

Մեղադրող դատախազ Պետրոս Պետրոսյանն էլ նշեց, որ մեր օրենսդրությամբ և ԵԽԽՎ հանձնարարականների համաձայն ՝ ներպետական ատյանները որևէ պարտականություն չեն կրում խափանման միջոցներին նաև սեփական նախաձեռնությամբ անդրադառնալու, այլ՝ այդ իրավունքի իրացումը դիտվում է բացառապես պաշտպանական կողմի կողմից այդ իրավունքի իրացման սահմաններում։ Նրա խոսքով՝ խափանման միջոցի հարցը պարբերաբար քննարկման առարկա է դարձել և այս գործով հատուկ ջանասիրություն է ցուցաբերվել դատարանի կողմից։ Պետրոսյանը նշեց, որ ներկայացված միջնորդությունները ենթակա են մերժման։

Հիշեցնենք, որ այսօրվա նիստում արդեն իսկ ներկայացվել է Ռոբերտ Քոչարյանի խափանման միջոցը փոխելու երեք միջնորդություն՝ անձնական երաշխավորությամբ ազատ արձակելու, կորոնավիրուսով պայմանավորված խափանման միջոցն ընդհանրապես վերացնելու մասին, ինչպես նաև՝ գրավ կիրառելու մասին։

Հեղինակ՝ Իզաբել Սահակյան

Աղբյուր` Փաստինֆո