Փաստ ինֆո

Անձնական երաշխավորները մարդիկ են, որոնց վերաբերյալ հանրային ընկալումը և դիրքորոշումը շատ տարբեր է, հիմնականում՝ բացասական։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց տուժողի իրավահաջորդի ներկայացուցիչ Տիգրան Եգորյանը։ Վերջինս նշեց, որ անձնական երաշխավորության պարագայում կարևոր է երաշխավորողի հեղինակությունը և արդյոք երաշխավորողի հեղինակությունը, նրա ազդեցությունը կարող է զսպել ռիսկերը։ Վերջինիս հայտարարությանն արձագանքեց Ռոբերտ Քոչարյանի պաշտպանական խմբի անդամ Արամ Վարդևանյանը։ Ըստ Վարդևանյանի՝ նախկին վարչապետների մասին նման հայտարարություն անել չէր կարելի։ 

Վարդևանյանի առարկության ընթացքում միջամտեց նաև տուժողի իրավահաջորդի ներկայացուցիչ Սարգիս Քլոյանը՝ նախկին վարչապետների հասցեին հնչեցնելով «գող» և «ավազակ» արտահայտությունները։ Դատավոր Աննա Դանիբեկյանը նշեց, որ չի թույլատրել որևէ մեկին հայտարարությամբ հանդես գալ, միևնույն ժամանակ տուժողի իրավահաջորդ Քլոյանին հորդորեց ՝ զերծ մնալ ոչ կոռեկտ արտահայտություններ հնչեցնելուց և տեղից չխոսել։ Եգորյանն էլ նշեց, որ դա իր վստահորդի կարծիքն է վարչապետների մասին և դա, ըստ իր վստահորդի, համապատասխանում է գնահատողական «գող» և «ավազակ» լինելու ստանդարտին։ Եգորյանը ցանկացավ ավելի մանրամասն անդրադառնալ «գողությանը» և «ավազակությանը», սակայն պաշտպանական կողմն առարկեց, իսկ նախագահող դատավորն էլ արձանագրեց, որ այդ արտահայտությունները համարվում են վիրավորական և հարկ եղած դեպքում դատարանը կսահմանափակի ելույթ ունենալու հնարավորությունը։ Եգորյանի կարծիքով՝ երաշխավորողներից մեկն անձ է, ով զբաղեցրել է վարչապետի պաշտոնը և ազատվել է այդ պաշտոնից այն պատճառով, որ թույլ է տվել էթիկական խախտում, որը հանդուրժելի չի եղել այդ պաշտոնը զբաղեցնող անձի համար։

Նրա կարծիքով՝ Խոսրով Հարությունյանն այն անձը չէ, որ որպես երաշխավոր կարող է ազդեցություն ունենալ Ռոբերտ Քոչարյանի վրա, որ վերջինս փոխի իր դիրքորոշումը կամ որոշումը եւ ոչ էլ Վազգեն Մանուկյանն է կարող կամ Կարեն Կարապետյանը, Անուշավան Դանիելյանը։

Հիշեցնենք, որ այսօրվա նիստում արդեն իսկ ներկայացվել եւ քննարկվում է Ռոբերտ Քոչարյանի խափանման միջոցը փոխելու երեք միջնորդություն՝ անձնական երաշխավորությամբ ազատ արձակելու, կորոնավիրուսով պայմանավորված խափանման միջոցն ընդհանրապես վերացնելու մասին, ինչպես նաև՝ գրավ կիրառելու մասին։

Հեղինակ՝ Իզաբել Սահակյան

Աղբյուր` Փաստինֆո