Փաստ ինֆո

Պարբերաբար դիմում ենք ՀՀ ՔԿ ծառայությանը՝ հասկանալու, թե ինչ է կատարվում ՀՀ ՔԿՀ-ներում․սկզբից առանձին հարցումով ստացել էինք պատասխան՝ մի քանի անձ թեստավորվել են, պատասխանը բացասական է, որևէ վարակվածության դեպք չկա, ինչպես՝ կալանավորների, դատապարտյալների, այնպես էլ՝ ՔԿ ծառայողների շրջանում, սակայն երկու շաբաթ անց հայտնի դարձավ, որ արդեն ՔԿ ծառայողների շրջանում կան կորոնավիրուսի վարակման դեպքեր։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասել է Ռոբերտ Քոչարյանի պաշտպանական խմբի անդամ Հովհաննես Խուդոյանը։

Նրա խոսքով՝ ՀՀ-ում մեծանում է դինամիկան և ուշագրավ է նաև համապատասխան ոլորտների պատասխանատուների հայտարարությունները, օրինակ՝ գործադիր իշխանության հայտարարություններով հստակ ուրվագծվում են, որ ՀՀ բնակչությունը պետք է պատրաստ լինի կորոնավիրուսի պայմաններում ապրել ընդհուպ մինչեւ հաջորդ տարվա մարտ-ապրիլ ամիսները։ Բացի այդ՝ Արսեն Թորոսյանը հայտարարել էր, որ մինչև մայիսի վերջ կորոնավիրուսով վարակվածների թիվը կհասնի մինչև 10 հազարի։ Խուդոյանը նաև անդրադարձավ ԱՆ նախարար Ռուստամ Բադասյանի հայտարարությանը, որով վերջինս նշել էր, որ մի որոշ ժամանակ անց ՔԿՀ-ներում ևս կլինեն կորոնավիրուսի վարակման դեպքեր։ Անդրադարձ կատարվեց նաև ԵԽ խոշտանգումների կանխարգելման կենտրոնի զեկույցին, ԵԽ մարդու իրավունքների հանձնակատարի հայտարարությանը։

Անդրադառնալով՝ խափանման միջոցի հիմքերին, Խուդոյանն ասաց, որ 2018թ հուլիսի 3-ից գործն իրավական չէ, դա հասկանալու համար որոշակի ժամանակահատված պահանջվել է, սկզբում հասկացել են փոքր քանակի մարդիկ, ում հասանելի է եղել նախաքննական նյութերը, իսկ հրապարակային դատաքննության պարագայում դա հասկանալի է բոլորին։ Նրա խոսքով՝ այսօր բոլորը հասկանում են գործի և ակունքները, և հեռանկարները, որոնք խիստ կանխատեսելի է և որոշակի։

«Այս գործով չի լինելու մեղադրական դատավճիռ, որովհետև այս գործն այնքան իրավական խոտաններ ունի, որ թույլ չի տալիս քրեական գործի վարույթն, ուր մնաց՝ որևէ դատավճիռի կայացումը»,- ասաց Խուդոյանը՝ հավելելով, որ խնդիրն իրավական չէ, այլ՝ ընտրություն կատարելու։

Նա նաև նշեց, որ մայիսի 8-ին դատական նիստի նշանակումը սիմվոլիկ է ՝ կամ գնահատված դատական ակտ կլինի, կամ աւտ ավելի խոցելի, որովհետև հենց այս օրով ՀՀ-ում շատ ոչ այդքան հաճելի գործողություններ են կատարվում։

Հիշեցնենք, որ այսօրվա նիստում արդեն իսկ ներկայացվել է Ռոբերտ Քոչարյանի խափանման միջոցը փոխելու երեք միջնորդություն՝ անձնական երաշխավորությամբ ազատ արձակելու, կորոնավիրուսով պայմանավորված խափանման միջոցն ընդհանրապես վերացնելու մասին, ինչպես նաև՝ գրավ կիրառելու մասին։

Հեղինակ՝ Իզաբել Սահակյան

Աղբյուր` Փաստինֆո