Փաստ ինֆո

ՀՀ երկրորդ նախագահ Ռոբերտ Քոչարյանի ազատության համար անձնական երաշխավորություն ստանձնած 4 վարչապետներն այս պահին դատարանի դահլիճում են։

«Փաստինֆո»-ն ավելի վաղ տեղեկացրել է, որ Երեւանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, քննարկվում է Ռոբերտ Քոչարյանի խափանման միջոցը անձնական երաշխավորությամբ փոխելու միջնորդությունը։

«ՀՀ նախկին վարչապետներ Վազգեն Մանուկյանը, Խոսրով Հարությունյանը և Կարեն Կարապետյանը, ինչպես նաև Արցախի նախկին վարչապետ Անուշավան Դանիելյանը հանդես են եկել Քոչարյանի խափանման միջոց կալանքը անձնական երաշխավորությամբ փոխարինելու առաջարկով»,–ասաց Ալումյանը։

Անձնական երաշխավորություն ներկայացնելով` վարչապետները նշել են, որ Քոչարյանի խափանման միջոցը փոխելով` նա ազատության մեջ կդրսևորի պատշաճ վարքագիծ ու չի խուսափի վարույթ իրականացնող մարմին ներկայանալ։

Դրանից հետո նախկին վարչապետները մուտք գործեցին նիստերի դահլիճ եւ դատարանում  հայտարարեցին իրենց ցանկությունն ու պատրաստակամությունը՝ Ռ.Քոչարյանի համար որպես երաշխավոր հանդես գալու։

Հիշեցնենք, որ Ռոբերտ Քոչարյանի խափանման միջոցը փոխելու առաջին միջնորդությունը՝ անձնական երաշխավորությամբ ազատ արձակելու մասին ներկայացվել է դեռեւս մարտի 16-ին, սակայն առ այսօր այն չի քննարկվել։ Մարտի 17-ին նշանակված դատական նիստը հետաձգվել է, թեեւ փաստաբանները նախապես ճշտել էին դատարանից, որ նշանակված նիստը կայանալու է , բայց չի կայացել։ Հետագայում պարզվեց, որ Աննա Դանիբեկյանն անաշխատունակության թերթիկ է վերցրել մարտի 13-ից մինչեւ ապրիլի 16-ը, որի ընթացքում պետպատվերի շրջանակներում քթի վիրահատություն է արել։

Անաշխատունակության ժամկետը լրանալուց հետո էլ՝ ապրիլի 17-ին հայտնի դարձավ, որ դատավորը հիմա էլ հերթական արձակուրդ է վերցրել մինչեւ մայիսի 7-ը։

Հեղինակ՝ Իզաբել Սահակյան

Աղբյուր` Փաստինֆո