Փաստ ինֆո

Իշխանությունն ամեն օր դառնում է բռնության զոհ սերժական, քոչարյանական հանցավոր բանդայի ու նրանց խորհրդարանական սպասարկումների կողմից

Ես դատապարտում եմ բռնության ցանկացած երևույթ իր բոլոր դրսևորումներով, որովհետև բռնությունը լինում է ոչ միայն ֆիզիկական, այլև բարոյական, հոգեբանական։ Պետք է շատ ուղիղ ընդգծել, որ արդեն երկու տարի հեղափոխական թիմը, այդ թվում այս խորհրդարանական մեծամասնությունը, կառավարությունը հետևողականորեն ու շարունակաբար ենթարկվում է բարոյական ու հոգեբանական բռնությունների։ Այս մասին այսօր ԱԺ ամբիոնից ասաց ՀՀ վարչապետ Նիկոլ Փաշինյանը՝ անդրադառնալով այսօր ԱԺ-ում տեղի ունեցած միջադեպին։

Նա շեշտեց, որ խորհրդարանական մեծամասնության կին պատգամավորներին սոցցանցերում սպառնում են բռնաբարել, նրանց երեխաներին սպառնում են փողոցներում «սատկացնել» և ստահոդ տեղեկություններ են արածում «Իմ քայլը» խմբակցության պատգամավորների վերաբերյալ։

«Այս ամենն ունի մեկ նպատակ՝ խեղճացնել քաղաքական մեծամասնությանը, քայքայել քաղաքական մեծամասնությունը և քայքայել ժողովրդի ու քաղաքական մեծամասնության միջև առկա վստահությունը։ Այո, երեկ ԼՀԿ ղեկավարն ինձ հրավիրել է սուրճ խմելու, ու ես ընդունել եմ հրավերը, ինքս իջել եմ իմ նախկին աշխատասենյակ, որտեղ այժմ պարոն Մարուքյանն է նստում ու ուղիղ ասել, որ ունենք հիմքեր կասկածելու, որ Դուք և Ձեր գործունեությունը հոգեբանական, բարոյական, ֆիզիկական բռնություններ գործադրելու պլանի անբաժանելի մասն եք։ Եվ ես դիտելով այսօր տեղի ունեցածի տեսագրությունը մի պարզ հարց եմ տալիս՝ միջադեպը, որը դատապարտելի է տեղի է ունեցել ամբիոնից այն կողմ, հարց, իսկ ի՞նչ գործ ուներ ելույթ ունեցողը այնտեղ կանգնած»,-ասաց Փաշինյանն ու հարցրեց, թե ինչու էր Մարուքյանը գնում դեպի Սասուն Միքայելյանը։

Վարչապետն ընդգծեց՝ տեղի ունեցածն այլ կերպ, քան քստմնելի սադրանք անվանել հնարավոր չէ. «Բայց ես նաև դատապարտում եմ այն, որ մենք տրվում ենք սադրանքների, իմ եղբորը, իմ ընկերոջը ես դատապարտում եմ, որովհետև մենք իրավունք չունենք տրվել սադրանքների։ Մեզ անընդհատ, ամեն օր ուզում են շեղել մեր արժեքներից, նրանք մեզ ուզում են դարձնել իրենց «պադեզդներում ծեծողներ», նրանք մեզ ուզում են հավասարեցնել «քիլերներին», ուզում են մեզ շեղել մեր արժեքների, ուզում են մեզ հանել հավասարակշռությունից, և այո, այսօր Հայաստանում հաստատված է բացառիկ իրավիճակ, երբ իշխանությունն ամեն օր դառնում է բռնության զոհ սերժական, քոչարյանական հանցավոր բանդայի ու նրանց խորհրդարանական սպասարկումների կողմից»։

Փաշինյանը հայտնեց, որ այսօր տեղի ունեցածը համարում է հեղափոխությունից հետո իր ամենամեծ պարտությունը, բայց դա որևէ մեկին հուսավառ չպետք է անի, քանի որ ինքը քանիցս պարտվել է, տեսել է քմծիծաղը ստի, բայց իր կամքը ամուր է քարից էլ ու հոգին հանձնվել չգիտի։

«Այս ամենը կապ ունի «Ապօրինի գույքի բռնագանձման մասին» օրենքի հետ, այս ամենը կապ ունի բազմաթիվ ու բազմապիսի քրեական գործերի հետ, որովհետև երբ այդ գողացված միջոցները վերադարձվեն, բա որտեղից են իրենց թուլափայը ստանալու թուլափայ ստացողները։ Այսօր բռնության է ենթարկվում ոչ միայն իշխող մեծամասնությունը, հոգեբանական բռնության է ենթարկվում հանրությունը, որովհետև նրանք մեզ ուզում են դնել ընտրության առաջ. Կամ մենք պետք է դառնանք «պաձեզդներում» ծեծողներ կամ մեր թիմակիցները պետք է վախենան «պադեզդներ» մտնելուց։ Թույլ չենք տա, այո, այդ «պադեզդներում» ձեզ ասֆալտներին կպառկացնենք։ Դուք չունեք հնարավորություն ժողովրդից վերցնել այն իշխանությունը, որը պատկանում է ժողովրդին»,-ասաց վարչապետը։

Աղբյուր` Փաստինֆո