Փաստ ինֆո

Օրերս հանրությանը ցնցած ինքնասպանության դեպքը բազմաթիվ անպատասխան հարցեր առաջացրեց։ Բոլորին է հետաքրքրում՝ ինչը կարող էր տղամարդուն դրդել վերջ տալ ոչ միայն իր, այլև երեխաների կյանքին։ 

«Փաստինֆո»-ի հետ զրույցում հոգեբան Իրինա Ծատուրյանն ասաց, որ տեղեկատվության պակաս կա, սակայն ինքնասպանությունը համարվում է կա՛մ իսկապես հոգեկան հիվանդության սկիզբ, կա՛մ ուղղակի ծայրաստիճան սուր վիճակում եղած մարդու վիճակ. «Ինքնասպանությունը ներանձնային կոնֆլիկտի դեստրուկտիվ մեթոդն է, այսինքն՝ ոչ կառուցողական մեթոդն է, երբ մարդն ունենում է ներանձնային կոնֆլիկտ։ Տվյալ դեպքում ներանձնային կոնֆլիկտն այն էր, որ տվյալ տղամարդը հավանաբար ծանր ճակատագիր ունենալով՝ չհաշտվեց այն իրավիճակի հետ, որի մեջ գտնվում էր և վերջ տվեց ոչ միայն իր, այլև երեխաների կյանքին։ Երկու դեպքում էլ նա դրա իրավունքը չուներ, սակայն իրավունքի մասին կարող ենք խոսել, եթե անձն առողջ է, բայց մենք չգիտենք անձն առողջ է եղել, թե ոչ»,-նշեց հոգեբանը։

Վերջինիս խոսքով, եթե մարդն ունենում է հոգեկան խնդիրներ, ապա «հասկանալ» հասկացությունն արդեն անտեղի է, սակայն այլ հարց է, թե այդ դեպքում ինչպես կարող են շրջապատի մարդիկ պահվածքի փոփոխություն չնկատեն։ Իրինա Ծատուրյանը նշում է, որ ինքնասպանության դեպքերն աստիճանաբար շատանում են և համապատասխան մասնագետները նման դեպքերը պետք է շատ լավ ուսումնասիրեն. «Բոլոր երկրներում կան վստահության հեռախոս, որ գտնվում է պետական հոգածության տակ, և մարդիկ այդ համարն իմանում են ու նման դեպքերում զանգահարում։ Տվյալները ցույց են տալիս, որ դրա միջոցով մեծ թվով ինքնասպանության դեպք է կանխվում։ Դրա մասին նույնպես պետք է մտածենք ու հետազոտենք»,-նշեց հոգեբանը։

Վերջինս նաև գտնում է, որ այս հարցում մեծ դեր ունի նաև անտարբերությունը։ Իրինա Ծատուրյանը կարծում է, որ մարդիկ այժմ էմոցիապես անտարբեր են դարձել և կարծես նրանց չի հետաքրքրում դիմացինն ինչ վիճակում է գտնվում. «Այս անտարբերությունը շատ հաճախ հանցավոր է դառնում։ Մեր խնդիրներն այնքան են շատացել, որ հազիվ կարողանում ենք մեր խնդիրները լուծել և էմոցիապես շատ սառն ենք դարձել։ Սրա վրա նույնպես պետք է ուշադրություն դարձնենք։ Մարդն իր կյանքին վերջ տվեց, իսկ մենք, երբ տեսնում ենք մեր հարևանը կամ բարեկամը տարօրինակ է, ի՞նչ ենք անում։ Հիմնականում մտածում ենք, որ մեր գործը չէ և չենք մտածում հարցնենք, փորձենք օգնել։ Նման դեպքերում հարևանը, բարեկամը պետք է զգա այդ տագնապը»,-ասաց Իրինա Ծատուրյանը։

Հեղինակ ՝ Հասմիկ Կոշկարյան

Աղբյուր` Փաստինֆո