Փաստ ինֆո

Քաղաքական գործիչներ են հանդիպել են, այստեղ քննարկելու խնդիր չկա, իսկ մեզ հետաքրքրող հարցերի պատասխանները ստանալու համար արտաքին գործերի նախարարին հրավիրելու ենք խմբակցություն, և այդ հարցերն անպայման բարձրաձայնելու ենք, որպեսզի հասկանանք՝ ինչ է կատարվում։ Այս մասին այսօր «Փաստինֆո»-ի հետ զրույցում ասաց ԱԺ «Բարգավաճ Հայաստան» խմբակցության քարտուղար Արման Աբովյանը։ 

Հիշեցնենք, որ այսօր ԱԺ-ում տեղի է ունեցել ՀՀ վարչապետ Նիկոլ Փաշինյանի ու «Լուսավոր Հայաստան» խմբակցության ղեկավար Էդմոն Մարուքյանի հանդիպումը, որի ընթացքում քննարկվել են Արցախի ինքնորոշմանը վերաբերող հարցեր։

Հարցին, արդյոք մտահոգությունների տեղիք չի տալիս փաստը, որ վարչապետը հստակ չի պատասխանում՝ բանակցությունների սեղանին փուլային տարբերակն է, թե ոչ, Աբովյանը պատասխանեց. «Եկեք իմ մտահոգություններն ու անձնական կարծիքը դնենք մի կողմ, սա քաղաքադիվանագիտական պրոցես է և ավելի ծավալուն կարելի է հարցերին պատասխանել, երբ տեղեկություն լինի, այդ պատճառով էլ հրավիրել ենք Արտաքին գործերի նախարարին»։

Նա շեշտեց, որ հայության մեջ գրեթե գոյություն չունի այնպիսի մարդ, որը դեմ կլինի Արցախի անկախության լեգիտիմիզացիային։

«Երկու տարի է բանակցություններ են ընթանում, քննարկվում են որոշակի հարցեր, որոնք այս կամ այն ձևաչափով, մեկ-մեկ, կիսատ-պռատ հնչեցվում են։ Մեր ասածն այն է, որ ի սկզբանե գոյություն ունի հարցերի հաջորդականություն։ Հայ ժողովուրդն Արցախի հարցն արդեն լուծել է, և այս դեպքում չպետք է քննարկվի ստատուսի խնդիր, հիմքում պետք է դրվի Արցախի դե յուրե միջազգային լեգիտիմիզացիան։ Երբ Արցախի դե յուրե լեգիտիմիզացիայի հարցը կլուծվի, դրանից հետո Արցախը կկարողանա լուծել յուրաքանչյուր խնդիր»,-նշեց խմբակցության քարտուղարը։

Նա վերահաստատեց իր համոզմունքը, որ Ադրբեջանը հետաքրքրված չէ արցախյան հիմնախնդրի լուծմամբ, որը կլինի քաղաքակիրթ ու միջազգային նորմերի համապատասխան ձևով։

«Ադրբեջանը առաջ տանելով պանթուրքական պրոեկտը ցանկանում է մեր հայրենիքը ձերբազատել մեզնից։ Դա է Ադրբեջանի առաջ դրված նպատակը։ Տեսեք՝ ինչ է կատարվել Նախիջևանի հետ, նույնիսկ խորհրդային ժամանակահատվածում միևնույն է Ադրբեջանը շարունակում էր այդ պրոցեսը՝ փափուկ ուժ օգտագործելով։ Փաստացի Նախիջևանը հայաթափվեց և դա եղավ այն ժամանակ, երբ չկար պատերազմ, լարվածություն, առճակատում։ Եվս մեկ անգամ կրկնում եմ՝ Ադրբեջանը հետաքրքրված չէ, որ հարցը լուծվի քաղաքակիրթ ճանապարհով»,-ամփոփելով խոսքն ասաց Արման Աբովյանը։

Հեղինակ՝ Սոնա Գեւորգյան

Աղբյուր` Փաստինֆո