Փաստ ինֆո

Մենք էլ ենք մարդ։ Կառավարության դիմաց հավաքված քաղաքացիներից մեկը «Փաստինֆո»-ի թղթակցի հետ զրույցում ասաց, որ ՌԴ քաղաքացիներ են և մնացել Հայաստանում, սահմանները փակվել են ու չեն կարողանում վերադառնալ՝ իրենց բնակության վայրը, իրենց աշխատանքին։ Նրանք վարչապետ նիկոլ Փաշինյանից ակնկալում են, որ օգնի հարցի կարգավորմանն ու մեքենաներով կարողանան հատել սահմանն ու Վրաստանի տարածքով գնան Ռուսաստան։

«Մենք պատրաստ ենք մեր կողմից ֆինանսավորել և՛ վրացական կողմը, և՛ հայկական կողմը, որ մեզ կարողանան ուղեկցել մինչև Վերին Լարս, հասցնել ՌԴ։ Մենք մոտ երկու ամիս է այստեղ ենք, չենք կարողանում գնալ մեր մեքենաներով»,- ասաց նա։
Նրա խոսքով՝ հասկանում են, որ ավտոբուսներով և ինքնաթիռով մեկնելը վտանգավոր են մարդկանց առողջության համար, եթե մեկը հիվանդ լինի, մնացածն էլ կվարակվեն։
«Մենք այդ ամենը հասկանում ենք, դրա համար խնդրում ենք, որ ընկեր Փաշինյանը օգնի մեզ, վրացական վարչապետի հետ կամ իրենց կառավարության հետ պայմանագիր կնքեն, որ մենք կարողանանք անցնել։ Ոնց որ Հայաստանի քաղաքացիներին Թուրքիայից Վրաստանով բերեցին, այդ նույն ձևով կարողանանք անցնել։ Մենք էլ ենք հայ, տարբերություն չկա՝ ՌԴ քաղաքացի ենք, թե այլ երկրի քաղաքացի»,- ասաց նա՝ հավելելով, որ կան մարդիկ, ովքեր ՀՀ քաղաքացի են, բայց նրանց կինը կամ ամուսինը ՌԴ քաղաքացի են, նրանք էլ իրավունք ունեն ՌԴ գնալու։

Նա նշեց, որ, եթե մարդիկ լինեն սեփական մեքենաներով, խնդիր չի լինի. «Մեզ ասել էին, որ կարող են ախտահանել մեքենաները, ախտահանելուց հետո կալոնաներով կարող ենք գնալ։ Հիմա մենք համաձայն ենք, եթե պետք է ֆինանսավորել այդ ախտահանման պահը, համաձայն ենք, միայն թե վրացական կողմը մեզ ընդառաջի և ընկեր Փաշինյանը մեզ օգնի։ Մենք իր խորհուրդներով եկել ենք Հայաստան, որ մեր Հայաստանը ծաղկացնենք, ապրենք, աշխատենք։ Մենք նույն ձևով խնդրում ենք, որ ինքը մեզ լսի։ Ոնց մենք ենք իրեն լսել, նույն ձևով էլ ինքը մեզ լսի։ Բոլորս էլ մարդ ենք։ Բոլորս էլ հասկանում ենք, որ շատ մարդիկ կան, ովքեր շատ բան են խոստանում, բայց երբ գալիս են իրենց ուզածին, մարդկանց մասին մոռանում են։ Մենք խնդրում ենք, որ մարդկանց մասին չմոռանան։

Որ օրգանին չենք դիմում, այնպիսի տպավորություն է, որ մեր համար չեն աշխատում։ Մարդկանց մասին ոնց որ բոլորը մոռացած լինեն։ Իրենք իրենց կաբինետներում նստած են, լավ աշխատավարձ են ստանում, բայց հենց այդ ամենը սկսվում է, այն ամբիցիաները, որոնք եղել են նախկինում, մոռանում են։ Այն, ինչի մասին խոստանում էին հեռուստատեսությամբ, հավաքույթների ժամանակ, մոռանում են։ Մենք խնդրում ենք, որ մեր մասին չմոռանան, մենք հայ ենք։

Այնպես պետք է անել, որ հայ ժողովուրդը վերադառնան Հայաստան։ Գիտեմ, որ սխալ է մեր կողմից գնալ Ռուսաստան, բայց արտակարգ դրության պատճառով, ափսոս, որ ոչ մի աշխատանք չենք կարողանում գտնել։ Դրա համար մենք շատ ենք խնդրում, որ ընկեր Փաշինյանը մեզ չմոռանա »։

Աղբյուր` Փաստինֆո