Փաստ ինֆո

Ոչ մի կառավարություն Ղարաբաղի հարցի իր դիրքորոշման մասին այնքան բան չի ասել, ինչքան ասել է մեր կառավարությունը։ Այս մասին այսօր ԱԺ-ում կառավարության անդամների հետ հարց ու պատասխանի ժամանակ ասաց ՀՀ վարչապետ Նիկոլ Փաշինյանը։

«Մենք բազմիցս դիրքորոշումներ ենք արտահայտել և կներեք, եթե որևէ մեկն ուզում է կասկածի տակ դնել մեր դիրքորոշումը, ես դա համարում եմ մանիպուլյացիա։ Մենք ինքներս մեր դիրքորոշումը ձևակերպելիս այնքան բուֆերներ և հակակշիռներ ենք դրել, որ ընդհանրապես սենց քննարկում պետք է Հայաստանում տեղի չունենար։ Չի լինելու այնպես, որ մեզ ինչ-որ ուժեր վախեցնեն, որ մենք գնանք բանակցային սեղանի շուրջ նստենք ու ձեռներներս դողա, վայ հանկարծ սխալ կներեք չփռշտանք, որ դա չդառնա պատմություն։ Մենք ունենք մեր ժողովրդի լիազորությունը՝ բանակցել այդ հարցի շուրջ, և մենք այդ լիազորությունն օգտագործելու ենք, բոլոր հնարավոր դիվանագիտական հմտությունները, բոլոր հնարավորություններն օգտագործելու ենք բանակցային սեղանի շուրջ և թող մեզ ոչ մեկ չասի՝ էդ ինչ եք բանակցում։ Ինչ-որ պետք է, այն էլ բանակցում ենք»,-ասաց Նիկոլ Փաշինյանը՝ ընդգծելով, որ իրենցից պատասխան կարող է պահանջել ՀՀ ժողովուրդը։

Վարչապետը նշեց, որ երբ կհամարեն՝ այդ բանակցության արդյունքում ունեն մի բանաձև, որը կարող են ներկայացնել Անվտանգության խորհրդին, Ազգային ժողովին, ժողովրդին, ապա կներկայացնեն։

Նիկոլ Փաշինյանը հավելեց, որ Ադրբեջանի նախագահի հետ շփումներից զգում է, որ նա տրամադրված է հարցի լուծմանը. «Մենք էլ ենք կառուցողական տրամադրված, իրենք էլ։ Ռուսաստանի Դաշնությունն էլ է ուզում, ԱՄՆ-ն էլ, Ֆրանսիան էլ, բայց եթե պարզվի, որ Ադրբեջանը չի ուզում հարցը լուծվի, չի լուծվի հարցը»,-ասաց վարչապետը։

Աղբյուր` Փաստինֆո