Փաստ ինֆո

Նիկոլ Փաշինյանն ինձ արդեն վաղուց նշանակել է մեղավոր և այն մարդիկ, որոնք կատարում են իր ուղիղ հանձնարարականները, պատրաստված են ինձ կալանավորելու՝ առանց խոսելու հնարավորություն տալու։ Այս մասին ֆեյսբուքյան ուղիղ եթերի ժամանակ ասել է Վատիկանում ՀՀ նախկին դեսպան, ՀՀ երրորդ նախագահ Սերժ Սարգսյանի փեսա Միքայել Մինասյանը։

«Դուք իմ տեղը լինեիք, կգայի՞ք։ Իհարկե, ոչ։ Ես գալու եմ, որովհետև ինձ շատ ծանր է ապրել Հայաստանից դուրս՝ իմանալով, որ իմ ընկերները, իմ ընտանիքի անդամները, բոլորը Հայաստանում ենթարկվում են քաղաքական հետապնդումների։ Նրանց տները խուզարկվում են, նրանք հարցաքննվում են, բայց նրանք գիտեն, որ դա իմ ընտրած ճանապարհն է»,-ասաց Միքայել Մինասյանը։

Հարցին՝ ինչու չէր խոսում «Սերժի վախտ», Մինասյանն ասաց, որ այդ ժամանակ ընդամենը երկու մարդ էին խոսում՝ Սերժ Սարգսյանը և Նիկոլ Փաշինյանը։

«Ես մերժել եմ Նիկոլ Փաշինյանի առաջարկը, որովհետև նրան և իր կառավարությանը համարում եմ ժողովրդի դավաճաններ և պետության թշնամիներ։ Իմ հայրենասիրությունը, իմ անցած ուղին, իմ դաստիարակությունն ինձ թույլ չտվեցին, որ ես նույնիսկ մտածեմ, որ կարելի է պայմանավորվել մարդկանց հետ, որոնց շարքերում կան պետական դավաճաններ և գործակալներ»,-ասաց Միքայել Մինասյանը՝ հավելելով, որ կգա ժամանակը և դրա մասին կխոսեն։

Աղբյուր` Փաստինֆո