Փաստ ինֆո

Քրեական ենթամշակույթի դեմ չեն պայքարում գեղեցիկ օրենքներ ընդունելով կամ դրա վերաբերյալ պոպուլիստական հայտարարություններ անելով, - «Փաստինֆո»-ի հետ զրույցում ասաց փաստաբան Ալեքսանդր Կոչուբաևը:

«Մեր երկրում ընդամենը գեղեցիկ օրենքներով են պայքարում քրեական ենթամշակույթի դեմ, բայց դրանք արդյունավետ չեն, քանի որ սպանությունները ոչ միայն չեն քչացել, այլև՝ դրանց թիվն աճել է, փոխվել է դրանց դաժանության՝ որակական կողմը»,- նշեց Կոչուբաևը:

Փաստաբանի գնահատմամբ՝ քրեական ենթամշակույթի դեմ պայքարը ենթադրում է բավականին ծավալուն, գերծանր, գերլարված քրեաբանական անալիզ, թե ինչպիսին է հանցավորությունը ՀՀ-ում, ինչ որակական փոփոխությունների է ենթարկվել վերջին տարիներին:

«Գավառի այս արյունալի դեպքերը ևս քրեական ենթամշակույթի էլեմենտների ազդեցության տակ են եղել, քանի որ հարցերը լուծվել են այլ օրենքներով, քան՝ ՀՀ օրենքներն են, այլ հիմքով: Սա ևս քրեական ենթամշակույթ է: Այնպես չէ, որ քրեական օրենսգրքում ամրագրենք հոդված, որն արգելում է օրենքով գողի տիտղոս ունենալ և վերջ՝քրեական ենթամշակույթը վերանում է»,- նշեց փաստաբանը:

Նրա խոսքով՝ մենք ականատես ենք լինում վենդետաների, քանի որ չունենք այնպիսի վստահելի համակարգ, որը կլուծի մարդկանց հարցերը:

Դիտարկմանը, որ Գեղարքունիքի մարզում սպանությունները, վենդետայի երևույթը կարծես թե սովորական են դարձել, Կոչուբաևն արձագանքեց, որ Գեղարքունիքի մարզն ունի որոշակի առանձնահատկություններ, մասնավորապես՝ Գավառի և Գավառի գյուղերի բնակիչները մի փոքր ավելի էմոցիոնալ են, իմպուլսիվ են և՛ դրական, և՛ բացասական առումով և հենց այդ բռնկվածության ֆակտորի հետևանքն է, որ այս մարզում հաճախակի են նման դեպքերը:

«Եթե կան մահեր, սպանություններ, ծանր մարմնական վնասվածքներ, այո, սա ոստիկանության բացթողումն է, սակայն կոնկրետ այս դրվագը ոչ միայն ոստիկանության, այլև՝ մարզային իշխանությունների և առողջապահական համակարգի մեղավորությունն էր, որովհետև չէր կարելի ենթադրյալ սպանություն կատարած անձանց բերել և տեղավորել նույն քաղաքի հիվանդանոցում՝ բուժում ստանալու: Բավականին կանխատեսելի էր, որ նման իրադարձություններ, վրեժխնդրության տարրեր պետք է լինեին և սա շատ լուրջ բաց է: Մենք ունենք արդեն երկու զոհ, երկու ծայրահեղ ծանր վիճակում գտնվող անձ և սա ոչ այլ ինչ է, քան իրավապահ համակարգի լրջագույն բացթողում»,- ասաց փաստաբանը:

Հեղինակ՝ Իզաբել Սահակյան

Աղբյուր` Փաստինֆո