Փաստ ինֆո

Հայաստանի տնտեսության մեջ վերջին երկու տարիներին ներդրումային լուրջ հետք չկա, իսկ տնտեսության այն ոլորտներում, որտեղ որոշակի աշխուժություն կա, օրինակ, լեռնահանքային արդյունաբերության նոր ներդրումների կարիք չկա, դրանք աշխատում են:

«Փաստինֆո»-ի հետ զրույցում նման կարծիք հայտնեց տնտեսագետ «Պոլիտեկոնոմիա» հետազոտական ինստիտուտի ներկայացուցիչ Արա Գալոյանը՝ անդրադառնալով Հայաստանի ներդրումային միջավայրին ու ներդրումների խնդրին:

Արա Գալոյանի խոսքով, վերջին վիճակագրական տվյալները փաստում են, որ ներդրումների նվազում ունենք: Նույն վիճակագրությանն այսօր խորհրդարանում հղում էր արել ԱԺ ԲՀԿ խմբակցության պատգամավոր Միքայել Մելքումյանը՝ վարչապետից հետաքրքրվելով, իչնչպես է հայտարարվում, որ տնտեսությունը զարգանում է, երբ ներդրումները երկու անգամ նվազել են: Ի պատասխան Փաշինյանը ասաց, թե նախկինում օտարերկրյա ներդրումների անվան տակ Հայաստանի կոռումպացված չինովնիկները իրենց փողերը պտտում էին: Վարչապետը «Գոլդեն փելես» հյուրանոցի օրինակը բերեց ու ասաց, որ արդյունքում այն պետականացվել է:

Արա Գալոյանը Փաշինյանի մոտեցումն անտրամաբանական է համարում: «Ասենք եղել է նման բան, մենք ի՞նչ կարող ենք անել, եկեք պրագմատիզմի տեսանկյունից նայենք խնդրին, պատժեցինք, «Գոլդեն Փելես»-ը վերցրեցինք, եւ ի՞նչ դարձավ այն պետության համար, պատրա՞ստ են հրապարակել այն տվյալները, թե որքան գումար է կորցնում պետությունն այդ հյուրանոցը անիմաստ պահպանելու համար: Չեն հրապարակի»,-նշեց տնտեսագետը՝ հիշեցնելով, որ կառավարության նիստերից մեկի ժամանակ նույնիսկ վարչապետը զարմացավ, թե ոստիկանությունը պահպանության համար ինչո՞ւ է այսքան փող ուզում:

«Բա հինգաստղանի , հրաշալի կահավորված հյուրանոցը պահպանելու համար ոստիկանությունը ամսական 100 հազար դրա՞մ պետք է ուզեր: Հասկանո՞ւմ եք, սիրում ենք ասել՝ խլենք այս մեծահարուստի տունը, խլենք այն մեծահարուստի գույքը, բայց խլենք, ի՞նչ անենք, մյուս մեծահարուստը, որ կարող էր գնել այդ տունը, արդեն դրանից ունի կամ ո՞ւմ վաճառենք, դրսից ո՞վ է գալու մեր մեծահարուստի տունն առնի: Նույնիսկ մեր շատ սիրելի Սերժ Թանկյանը չեկավ մի բնակարան գնեց, խլենք ի՞նչ անենք, ծերանո՞ց սարքենք, ոչ մի պետություն իրեն չի կարող թույլ տալ այդ շքեղության ծերանոց պահել: Խլենք, ոստիկանական ջոկատներ նշանակենք, աշխատավարձ տանք որ պահե՞ն»,-բացատրեց տնտեսագետը:

Արա Գալոյանն ասում է՝ անհասկանալի է իշխանության տրամաբանությունը, որովհետեւ չպետք է թույլ տալ, որ պետությունը լրացուցիչ ծախսի տակ ընկնի, միայն այն պատճառով, որ ժամանակին ինչ-որ մեկը կասկածելի վարք է ունեցել, կասկածելի է՝ դատեք:

Այս ամենը ու նաեւ այն գործընթացները, որ տեղի են ունենում «Յուքոմ» ընկերության շուրջ, տնտեսագետի խոսքով, բացասական ազդակ են պոտենցիալ ներդրողների համար, իսկ ինչ վերաբերում է Սուրբ Աթոռում ՀՀ նախկին դեսպան Միքայել Մինասյանի հայտարարությանը, թե ԱԱԾ նախկին տնօրենը վարչապետի անունից իրեն գործարք է առաջարկել՝ քրեական գործեր չհարուցելու դիմաց, Արա Գալոյանը հիշեցրեց լատինական հայտնի ասացվածքը՝ «դրախտի ճանապարհը սալապատված է բարի ցանկություններով»:

«Կարող է մարդիկ բյուջեի համար փող են ուզում, անմեղության կանխավարկած կա, եկեք մտածենք, որ փող են ուզում բյուջեի համար, ոչ թե յուրացնելու , բայց բարի ցանկությունը պետք է հասկանալի լինի, փողը ինքնին ողբերգություն է, երբ շատ է ու անելիք չկա, մենք դա տեսել ենք նույն Սերժ Սարգսյանի օրոք, երբ փողը կար, անելիք չկար, մենք դա տեսել ենք 90-ականներին, երբ փողը վերածվում էր քարի, շքեղ բենզալցակայանների քանակով Երեւանը մրցակցում էր Դուբայի հետ, երբ ճոխ, կանաչ քարերով քաղաքի կենտրոնն էին երեսպատում, որովհետեւ անելիք չկար, հիմա, նոր իշխանությունների ողբերգությունն էլ այդ գաղափարի պակասն է եւ նրա ամենամեծ մեղքն այն է, որ չի փորձում հարթակներ կազմակերպել, որտեղ կարող են լինել գաղափարներ»:

Աղբյուր` Փաստինֆո