Փաստ ինֆո

Հայաստանի ոչ մի ղեկավար Արցախի հարցի վերաբերյալ այդքան մանրամասն դիրքորոշում չի հայտնել, որքան ես եմ հայտնել։ ԱԺ-ում ասաց ՀՀ վարչապետ Նիկոլ Փաշինյանը՝ անդրադառնալով «Բարգավաճ Հայաստան» խմբակցության պատգամավոր Նաիրա Զոհրաբյանի դիտարկմանը, որ Արցախի հարցում Փաշինյանը դիրքորոշումը չի հայտնել Լավրով ու Հասանովի վերջին հայտարարությունների վերաբերյալ։

Փաշինյանը շեշտեց, որ Հայաստանի ոչ մի ղեկավար Արցախի հարցի վերաբերյալ այնքան հրապարակային ու թափանցիկ չի եղել, ինչքան ինքը։

«Իմ դիրքորոշումները, ՀՀ կառավարության դիրքորոշումները գոյություն ունեն այնքանով, որքանով դրանք մեր դիրքորոշումներն են, այսինքն` մեր դիրքորոշումը գոյություն ունի, անկախ նրանից, թե աշխարհում ուրիշ ինչ դիրքորոշումներ գոյություն ունեն։ Այս ողջ կարգավորման պրոցեսը նրա համար է, որ պատասխանենք մեկ հարցի՝ կարող ենք արդյոք դիրքորոշումները մոտեցնել իրար, կարող ենք արդյո՞ք ձևակերպել ընդհանուր դիրքորոշում»,-ասաց վարչապետը։

Նա կրկին ընդգծեց, որ Արցախի հարցի որևէ լուծում չի կարող գործնականում դառնալ լուծում, եթե դա ընդունելի չէ ՀՀ և ԱՀ ժողովրդի համար։
«Այսինքն` դա ոչ թե իմ բարի ցանկություն է այդպես, դա այնպես է ի բնե։ Եթե նույնիսկ նախկինում եղել են իշխանություններ, որոնք մտածել են, որ կստորագրեն, կտանեն, լուծում կտան հարցին, ապա իրենք գերագնահատել են իրենց ուժերը»,-ասաց Փաշինյանը։

Նա հայտնեց, որ 2018թ-ի մայիսի 8-ից մինչև այսօր նա իր հայտնած դիրքորոշումներից ոչինչ, նույնիսկ մի ստորակետ, ոչ պակասեցնելու, ոչ էլ ավելացնելու անհրաժեշտություն չի տեսնում

«Քանի դեռ լուծում չի գտնվել, որը կարող է ընդունելի լինել Հայաստանի, Արցախի ու Ադրբեջանի ժողովրդի համար ու իշխանությունը չի ասել, որ x լուծումը կա, եկեք դռնփակ նիստ անենք քննարկենք գնալ այդ տարբերակով թե ոչ, իսկ մենք այսպիսի առաջարկով հանդես կգանք միայն այն պարագայում, երբ տեսնենք ինչ-որ տարբերակ կա, որը սկզբունքորեն կարող է քննարկելի ու ընդունելի լինել»,-ասաց Փաշինյանը։

Աղբյուր` Փաստինֆո