Փաստ ինֆո

Ես կայացրել եմ քաղաքական որոշում, որ Արգիշտի Քյարամյանն այդտեղ պետք է աշխատի, դա աշխատանքային անհրաժեշտություն եմ համարել, պարզապես օրենքն այդ միջանցքն է տվել, որպեսզի նա հայտնվի ԱԱԾ-ում: Այս մասին, այսօր ԱԺ-ում ասաց ՀՀ վարչապետ Նիկոլ Փաշինյանը:

Հիշեցնենք, որ նախկինում ՊՎԾ պետի տեղակալ Արգիշտի Քյարամյանը, որը կատարում էր նաև ՊՎԾ պետի պարտականությունները, մայիսի 4-ին ազատվել էր պաշտոնից ու նշանակվել Հայաստանի Հանրապետության քննչական կոմիտեի նախագահի տեղակալ, ապա մայիսի 5-ին նշանակվել էր ԱԱԾ տնօրենի տեղակալ։

«Ուզում եմ անկեղծ ասել, նկատել եք երևի, որ իմ քաղաքականությունը եղել է այն, որ ոստիկանությունում և ԱԱԾ-ում դրսից նշանակումներ չեն արվել՝ խոստման համաձայն, որ այդ համակարգերը պետք է ունենան հնարավորություն: Հիմա եկել է ժամանակը գնահատելու եւ վերագնահատելու արված աշխատանքի արդյունավետությունը եւ, այո, կարելի է դա ազդարարել որպես մի փուլի մեկնարկ, որտեղ կլինեն նաեւ դրսից նշանակումներ, իհարկե, մի փոքր կարող է կուլբիտային լինի, օրենսդրական միջանցքներով, բայց դա լավ է: Լավ է, որ կա այդ դժվարությունը»,-ասաց ՀՀ վարչապետը:

Նա շեշտեց, որ ուղիղ նշանակումները կարող են ջարդել համակարգի զինվորական տրամաբանությունը, և ըստ այդմ, կառավարությունը քաղաքական շահերից նահանջել է հանուն համակարգի:

«Մեր հույսն այն է, որ պետական համակարգերը կգնահատեն մեր վերաբերմունքը: Ոչ թե ոմանք կառիթավորվեն այդ վերաբերմունքից, այլ կգնահատեն։ Եվ սա մեր գաղափարախոսությունն է, մեր վերաբերմունքն ու անցած քաղաքական ճանապարհն է։ Մեր խնդիրը չէ, որ պինդ գրկենք այս ամբիոնն ու բաց չթողենք, մեր խնդիրն է, որ Հայաստանի զարգացմանը ներգրավի մեր ազգային ներուժի ամենամեծ հատվածը»,-ասաց Փաշինյանը։

Աղբյուր` Փաստինֆո