Փաստ ինֆո

Ինչու՞ Ռուսաստանի արտգործնախարար Սերգեյ Լավրովը Ղարաբաղի հարցի կարգավորման վերաբերյալ հիմա հանդես եկավ նման հայտարարությամբ և արդյոք այն որևէ կապ ունի ռուսական ընկերությունների վերաբերյալ քրեական գործերի հետ։ Այս հարցն այսօր ԱԺ հարց ու պատասխանի ժամանակ բարձրաձայնեց ԱԺ «Լուսավոր Հայաստան» խմբակցության պատգամավոր Արկադի Խաչատրյանը։

Պատգամավորի հարցին ի պատասխան ՀՀ արտգործնախարար Զոհրաբ Մնացականյանն ասաց, որ ունենք հայ-ռուսական հարաբերություններ, որոնք բավական հագեցած են օրակարգով, հիմնվում են հիմնավոր դաշնակցային հարաբերությունների այն բոլոր սկզբունքների վրա, որն արտահայտված է բազմաթիվ իրակավական փաստաթղթերում. «Մեր կառավարությունը բազմիցս ասել է, որ այդ հարաբերությունները եղել և մնում են Հայաստանի արտաքին քաղաքականության կարևորագույն ուղղություններից մեկը, և այդ ոգու մեջ շարունակում ենք աշխատել ՌԴ-ի մեր գործընկերների հետ։ Բնականաբար մենք ունենք տարբեր հարցեր մեր կողմից, ՌԴ-ի կողմից, ինչպես մենք ունենք հարցեր մնացած բոլոր գործընկերների հետ, բայց դրանից ամեն անգամ դարձնել դրամա։ Մենք միմյանց հետ աշխատելու բազմաթիվ հարթակներ ունենք և այդ բոլոր հարթակներում մենք աշխատում ենք օրակարգի բոլոր հարցերի շուրջ։

Հարաբերությունները անպայման չէ, որ է սկսեն և վերջանան կենացներով։ Յուրաքանչյուրն ունի իր գերակայությունները, ունի իր հարցերը, բայց սա համագործակցային հարաբերություններ են»,-ասաց ԱԳ նախարարը։

Աղբյուր` Փաստինֆո