Փաստ ինֆո

ՀՀ վարչապետ Նիկոլ Փաշինյանն այսօր Ազգային ժողովում հայտարարել է, որ իրավապահ համակարգն իրականում շոկի մեջ է, և ինքը դա տարբեր առիթներով զգում է։ 

«Օրինակ՝ նույն ոստիկանության, ԱԱԾ-ի աչքի առաջ տեղի է ունեցել մի բան, որը երկար տարիներ իրենց ներշնչել են, որ չի կարող լինել։ Խոսքը 2018թ-ի հեղափոխության մասին է ։ Այդ մարդկանց աչքի առաջ տեղի է ունեցել մի բան, որ իրենք նայել են ու իրենց աչքերին չեն հավատացել, որ հիմա սա ՀՀ-ում տեղի է ունենում։ Հիմա էլ շատ մարդիկ նայում են ու իրենց աչքերին չեն հավատում, որ ես այստեղ կանգնած եմ որպես ՀՀ վարչապետ»,-ասաց Նիկոլ Փաշինյանը։

Նա նշեց, որ այս կառույցները պետք է հասկանան՝ նոր իրավիճակում ավելի բարձր, ազնիվ ու պետական առաքելություն է դրված իրենց ուսերին։

«Ես այս համակարգերի ու ոստիկանության ամենամեծ խնդիրը հենց այդ շոկն եմ համարում, որը, ցավոք սրտի, մինչև հիմա հաղթահարված չէ։ Բայց ես կարծում եմ, որ մենք ոչ թե պետք է փայտը վերցնենք ու ընկնենք մեր ոստիկանների ու ոստիկանության հետևից, այլ պետք է օգնենք իրենց ու բարեփոխումներ անենք»,-ասաց ՀՀ վարչապետը։

Նա շեշտեց, որ այսօր ոստիկանի աշխատանքը գրավիչ չէ ոչ միայն համակարգում նոր ինտեգրվողի համար, այլև նույնիսկ ոստիկանի համար։
«Ես չեմ ուզում որևէ մեկին վիրավորել...ճիշտ է մենք մոտ 30 տոկոսով վճարումներն ավելացրել ենք, բայց գիտեք ինչքան կոռուպցիոն եկամուտից ենք զրկել ողջ իրավապահ համակարգին։ Ես վստահ եմ, որ այդ 30 տոկոսն ավելացրել ենք, բայց դրա արդյունքում նրանց համախառն եկամուտը նվազել է։ Սա խնդիր է, որը պետք է լուծենք»,-ասաց վարչապետ Փաշինյանը։

Աղբյուր` Փաստինֆո