Փաստ ինֆո

2019թ-ի ամենամեծ ձախողումը եղել է ՀՀ ժողովրդից գողացված գումարների վերադարձի գործընթացը, և ես պետք է խոստովանեմ, որ մենք այստեղ անհաջողություն ունենք, ինչն ունի և՛ օբյեկտիվ, և՛ սուբյեկտիվ պատճառներ։ Այս մասին այսօր ԱԺ-ում ասաց ՀՀ վարչապետ Նիկոլ Փաշինյանը։

Նա շեշտեց, որ զուտ վիճակագրորեն, օրինակ, հատուկ քննչական ծառայությունը 2019թ-ին պետական բյուջե վերադարձրել է 7 անգամ ավելի շատ գումար, քան իր գոյության ողջ պատմության ընթացքում։

«Եվ՛ ոստիկանությունը, և՛ ազգային անվտանգության ծառայությունը, և՛ քննչական կոմիտեն նախկինի համեմատ պետական բյուջե վերադարձրած գումարների թվերը տասնապատկել են, բայց, միևնույն է, ես համարում եմ, որ մենք կոռուպցիայի դեմ պայքարում ունենք անհաջողություններ և դրանք ունեն մի քանի շերտեր»,-ասաց ՀՀ վարչապետը։

Նա շեշտեց, որ դատաիրավական համակարգում կան նվիրյալ բարձր պրոֆեսիոնալներ, որոնք ոչ թե լոյալ կամ ոչ լոյալ են որևէ կառավարության կամ որևէ իշխանության նկատմամբ, այլ նվիրված են իրենց աշխատանքին ։

«Ես հիմա չեմ ասի, թե իրենք ինչ տոկոս են կազմում՝ ընդհանուր ֆոնը չփչացնելու համար, բայց մեր դատաիրավական և իրավական համակարգում կան կոռուպցիոն համակարգի նվիրյալներ և դավաճաններ, և դա մեզ համար լրջագույն խնդիր է։ Մեր դատաիրավական համակարգում կան անգրագետներ։ Հիմա հարց կառաջանա, թե այս 2 տարի, ինչով էիք զբաղված, մենք զբաղված էինք հետևյալով՝ երբեք չեն ուզել և չենք ուզում թացը չորին խառնել։ Ես կրկին ուզում եմ հիշել Աստվածաշնչյան հայտնի պատմությունը, որը վերջին 10 տարիների ընթացքում մի քանի անգամ վկայակոչել եմ իմ քաղաքական գործունեության ընթացքում։ Դա Սոդոմի ու Գոմորի կործանման պատմությունն է և այս համատեքստում Աբրահամի և Աստծո երկխոսությունը։ Որ երբ Սոդոմի ու Գոմորի կործանման մասին իմանում ՝է հարց է տալիս՝ եթե այդ քաղաքում 50 արդար լինի, կկործանե՞ս այդ քաղաքը, պատասխանը լինում է, որ ոչ, չեմ կործանի, ասում է՝ եթե 10 արդար լինի կկործանե՞ս, պատասխանում է, որ ոչ։ Ես ուզում եմ ասել, որ ՀՀ դատաիրավական համակարգում կան 10 արդարներ և ՀՀ կառավարությունն ու խորհրդարանական մեծամասնությունը դատաիրավական համակարգը քարուքանդ չի արել ու չի ավերելու միայն այդ պայմանականորեն 10 կամ 50 արդարների շնորհիվ»,-ասաց Փաշինյանն ու շնորհակալություն հայտնեց 50 արդարներին։

Նա 100 տոկոսով վստահեցրեց, որ կբացահայտվի ՀՀ-ում տեղի ունեցած կոռումպացված ամբողջ համակարգը՝ իր բոլոր ճյուղերով, անհատներով, դրամաշրջանառությամբ, ու բոլոր կոռուպցիոներները կկանգնեն պատասխանատվության առաջ։

Աղբյուր` Փաստինֆո