Փաստ ինֆո

Եթե մենք զարգանում ենք, ինչպես է լինում, որ ներդրումները Հայաստանից գնում են, թվերն էլ երկու անգամ կրճատվում են։ Այս մասին այսօր Ազգային ժողովում ՀՀ վարչապետ Նիկոլ Փաշինյանին հարցրեց ԱԺ «Բարգավաճ Հայաստան» խմբակցության պատգամավոր Միքայել Մելքումյանը։

Վարչապետը պատգամավորի դիտարկման պատասխանելով՝ ասաց, որ ժամանակին շատ մեծ, աղմկոտ և հաջող օտարերկրյա ներդրում եղավ, որի արդյունքում Հայաստանում կառուցվեց «Գոլդեն փելես» հյուրանոցը. «Գոնսալո Սանչեսը եկել էր Հայաստան ներդրումներ իրականացնելու, իսկ հետո պարզվեց, որ հիմա այդ գույքը, առնվազն Ծաղկաձորի մասով, ՀՀ սեփականությունն է և առգրավվել է, նվիրաբերվել է որպես կոռուպցիոն գույք։ Մենք կարող ենք օտարերկրյա ներդրումների կառուցվածքը բացել և տեսնել, որ այդ օտարերկրյա ներդրումների վերնագրի տակ Հայաստանի կոռումպացված չինովնիկները տարել են իրենց փողերը պտտել են։ Հիմա ինչ է տեղի ունենում։ Քանի որ բոլորը հասկացել են, որ հակակոռուպցիոն պայքարը շատ լուրջ է լինելու, նաև Հայաստանից այս ընթացքում փողեր են դուրս բերում այդ նույն մարդիկ։ Ընդհանուր առմամբ այո պրոբլեմ ունենք և այդ մեծ պրոբլեմների ամենակարևոր պարամետրն անկախ դատական համակարգի կայացումն է»,-ասաց Նիկոլ Փաշինյանը։

Վարչապետի խոսքով Հայաստանը նախորդ տարի եվրոբոնդերի բացառիկ հաջող գործարք ունեցավ. «500 մլն դոլար, դա իհարկե օտարերկրյա ներդրում է։ Մեր բանկերը, որոնք այսօր Fitch-ի և մյուս ռեյթինգային ընկերությունների կողմից ռեյթինգներ են ստանում ու միջոցներ են ներգրավում։ Մենք կառուցակարգեր ենք ստեղծում՝ խթանելու ներդրումները»,-ասաց վարչապետը։

Հավելենք, սակայն, որ «Գոլդեն փելես» հյուրանոցը ոչ թե առգրավվել է, այլ Արմեն Ավետիսյանի ընտանիքը 2018 թվականին կառավարությանը նվիրելու դիմում էր ներկայացրել, որի վերաբերյալ կառավարության համապատասխան որոշումն ընդունվել է դեռևս նախորդ տարի սեպտեմբերի 26-ի կառավարության նիստի ժամանակ։ Այն մի քանի անգամ հանվել է աճուրդի, սակայն գնորդ չի գտնվել ու հիմա ծառայում է որպես կորոնավիրուսով հիվանդների հետ հաղորդակցված անձանց մեկուսացման վայր։

Աղբյուր` Փաստինֆո