Փաստ ինֆո

ՀՀ վարչապետ Նիկոլ Փաշինյանն Ազգային ժողովում ներկայացնում է կառավարության ծրագրի 2019թ-ի կատարման ընթացքի ու արդյունքների մասին զեկույցը։

Նա հայտնել է, որ 2019թ-ին հաջողվել է գրանցել 2008թ-ից ի վեր ամենաբարձր տնտեսական աճը, այն է՝ 7,6 տոկոս, ինչն ամենաբարձրն է ԵԱՏՄ երկրների, հարևան երկրների և եվրոպական տարածաշրջանի երկրների համեմատ։

«Այսինքն, 2019թ-ին մեր մեծ տարածաշրջանում ամենաբարձր տնտեսական աճն ենք գրանցել։ 2019թ-ին տնտեսական աճն ուղեկցվել է տնտեսության ճյուղային կառուցվածքի բարելավմամբ, ցածր գնաճով, ֆինանսական կայուն ցուցանիշներով։ Ամենակարևոր արդյունքներից մեկն այն է, որ մշակող արդյունաբերությունում աճը 2019թ-ին 12 տոկոս է կազմել ու դարձել տնտեսության առաջատար ճյուղը»,-ասաց ՀՀ վարչապետը։

Նա նաև հայտնեց, որ 2019թ-ին Հայաստան այցելած զբոսաշրջիկների թիվն աճել է 14,7 տոկոսով, Հայաստանից ապրանքների ու ծառայությունների արտահանումն աճել է 10,3 տոկոսով և արտահանման էական աճ է արձանագրվել կոնյակի, մրգային գինիների, խաղողի գինու, բուսական ծագման արտադրանքի ապրանքախմբերում։

«Բարձր տեխնոլոգիական արդյունաբերության ոլորտում 2019թ-ին գրանցվել է շրջանառության շուրջ 30 տոկոս աճ, որը ներառում է համակարգչային ծրագրավորման, ինչպես նաև էլեկտրոնիկայի, միկրոէլեկտրոնիկայի և այլ բարձր տեխնոլոգիական ուղղություններ։ Շատ կարևոր եմ համարում արձանագրել, որ աճել է միջին տեխնոլոգիատար ապրանքների արտահանումը՝ 26,9 տոկոսով, և բարձր տեխնոլոգիատար ապրանքների արտահանումը՝ 13,3 տոկոսով»,-ասաց Փաշինյանն ու արձանագրեց, որ Կառավարությունն ապահովել է Հայաստանի ընթացքը դեպի բարձր տեխնոլոգիական, արդյունաբերական երկիր, որն արտահանմանը միտված տնտեսություն պետք է ունենա։

Աղբյուր` Փաստինֆո