Փաստ ինֆո

Որոշ տեղեկություններով՝ Էրիկ Գրիգորյանին ասել են, որպեսզի դիմում գրի և ազատվի աշխատանքից, և սա հաստատում է Արմեն Սարգսյանի կողմից որոշման շտապ ստորագրումը։ Այս մասին այսօր «Փաստինֆո»-ի հետ զրույցում ասաց «Էկո-մեդիա» ցանցի համահիմնադիր Նարինե Կիրակոսյանը։

Հիշեցնենք, որ ՀՀ նախագահի հրամանագրով Էրիկ Գրիգորյանն երեկ ազատվել է շրջակա միջավայրի նախարարի պաշտոնից։

Ոլորտի մասնագետների տեղեկություններով, որ համակարգից հեռանալու որոշումը կապված է հանքարդյունաբերության հետ։ Մեր զրուցակցի փոխանցմամբ՝  կառավարության ղեկավար պաշտոն զբաղեցնող պաշտոնյաներից մեկի կողմից հարցում է ուղարկվել շրջակա միջավայրի նախարարին, թե ինչպես և ինչ պայմաններում է եղել, որ պահպանվող տարածքներից օտարվել են ահռելի տարածություններ ու տրամադրվել հանքարդյունաբերողներին. «Խոսքն «ԱրևիՔ» ազգային պարկի մասին է, գուցե նաև Ամուլսարի հողահատկացումների հետ կապված հարց է եղել»։

Կիրակոսյանի գնահատմամբ՝ Էրիկ Գրիգորյանի բոլոր ծրագրերն անիրատեսական էին և բոլորն էլ տապալվեցին։

«Հայաստանն այսպես ասած պոչամբարների ձեռքը կրակն է ընկել։ Գրիգորյանի՝ նախարար նշանակվելը բազմիցս քննադատվել է, քանի որ նա միջազգային շատ կասկածելի ծրագրերի էր մասնակցում, որոնք ուղղակի գրանտներ էին, բայց իրատեսական չէին։ Այսինքն՝ ուղղակի փող լվանալու ծրագրեր էին։ Ես հանդիպեցի նրա հետ, առանձնազրույցի ժամանակ ասացի, որ պետք է լրագրողների հետ աշխատի, նշեցի, որ ինձ չի հետաքրքրում ով է եղել, ինչ է եղել, ոլորտից հասկանում է, թե ոչ, բայց հիմա պաշտոն է զբաղեցնում։ Մի քանի հարցեր դրեցի, որոնցից մեկը նա հենց առաջին պահերին փոխանցեց վարչապետին ու վարչապետը ելույթներից մեկում ասաց, որ պետք է բնապահպանություն լուսաբանող լրագրողների հետ կազմակերպել հանքերի, հանքավայրերի ստուգայցեր, սակայն երկու տարի անցավ, այդպես էլ չարեցին»,-նշեց մեր զրուցակիցը։

Նա արձանագրեց, որ նախարարի գործունեությանը ընթացքում չկատարվեց նաև Խոսրովի արգելոցի քարտեզագրումը և հետո պարզ դարձավ, որ Խոսրովի արգելոցի վիճելի տարածքներից մեկը Ռուբեն Խաչատրյանի անձնական հյուրանոցային հաստատություններից է՝ տնակի կարգավիճակով։

«Գրիգորյանն իր նախկին ընկերական շրջապատի հետ կապված շարունակել է գործունեությունը և դա տարատեսակ մտածմունքների տեղիք է տալիս և, ամենայն հավանականությամբ, կոռուպցիոն սխեմաների մասին է խոսում։ Օրինակ կա կլիմայի ծրագիր, որի հետ կապված նախարարը հրապարակում է նախկին փոխնախարարի՝ Խաչիկ Հակոբյանի հետ նկար, որը համայնքապետարանում կանաչապատման պետի պաշտոնից որոշակի չարաշահումների պատճառով կամ դուրս է եկել կամ դուրս է հրավիրվել»,-ասաց «Էկոմեդիա» ցանցի համահիմնադիրը։

Ամփոփելով խոսքը, Նարինե Կիրակոսյանը նշեց, որ մի շարք դեպքեր են եղել, երբ դիտավորությամբ, թե պատահմամբ նախկին նախարար Արամայիս Գրիգորյանի բարեկամները հայտնվել են բնապահպանական ծրագրերում։

Հիշեցնենք, որ հետհեղափոխական Հայաստանում բացահայտված կոռուպցիոն սկանդալներից մեկը վերաբերում է հենց բնապահպանության ոլորտին՝ հանքարդյունաբերությանը, որը տեղի է ունեցել նոր իշխանությունների օրոք։

Մասնավորապես 2020 թվականի փետրվարին ԱԱԾ-ն հաղորդագրություն տարածեց առ այն, որ պաշտոնատար անձը հանքարդյունաբերության արտոնագիր ստանալուն նպաստելու, այդ հարցում խոչընդոտները վերացնելու համար տնտեսվարող սուբյեկտից պահանջել և 2019 թ. սեպտեմբերից մինչև 2020թ. փետրվարի 8-ը մաս-մաս ստացել է առանձնապես խոշոր չափերով՝ 3.300.000 ՀՀ դրամ կաշառք։

Անհերքելի ապացույցների առկայության պարագայում ՀՀ ԱԱԾ օպերատիվ ստորաբաժանումների աշխատակիցների հսկողության ներքո հիշյալ փորձագետը 2020 թ. փետրվարի 18-ին Երևանի՝ Հանրապետության հրապարակի հարակից հատվածում կաշառքի հերթական գումարը ստանալիս, կաշառք տվող անձի հետ առձեռն բռնվել և բերման է ենթարկվել ՀՀ ԱԱԾ աշխատակիցների կողմից։ Անձնական խուզարկությամբ հայտնաբերվել և առգրավվել է կաշառքի առարկան։

Հեղինակ՝ Սոնա Գեւորգյան

Աղբյուր` Փաստինֆո