Փաստ ինֆո

Չի կարող որևէ մեկը սպասել, որ Հայաստանը որևէ քայլ կկատարի, որը համադրելի չէ, ենթադրում է զիջում և վնասում է մեր ազգային անվտանգությանը։ Շատ էական է մնալ սառնասիրտ և հանգիստ։ Այս մասին այսօր ԱԺ արտաքին հարաբերությունների հանձնաժողովի նիստի ժամանակ ասաց ՀՀ Արտաքին գործերի նախարար Զոհրաբ Մնացականյանը՝ անդրադառնալով Արցախի կարգավորման հարցին։

Մնացականյանն ընդգծեց, որ հայկական կողմը կտրականապես ժխտել է սպառնալիքի գործոնը բանակցային գործընթացում։

«Եթե ընդունում ենք, որ սպառնալիքն այնքան է, որ պետք է գնանք զիջման...ես կամ մեր կառավարությունը հասարակությունից կամ որևէ մեկից նման ազդակ չունենք: Շատ հստակ է՝ սպառնալիքի լեզուն ժխտված է, բանակցային լեզուն՝ ընդունված»,-ասաց նախարարն ու շեշտեց, որ բանակցային լեզվի մասին բազմիցս խոսել է։

Մնացականյանը շեշտեց, որ չի պատրաստվում ներգրավվել մրցակցության մեջ, թե ով է ավելի շատ հայրենասեր և ով ավելի քիչ։

«Երբ մենք ներգրավված ենք բանակցություններում առավել քան լուրջ ենք այն հարցերի շուրջ, որոնք Հայաստանի գերակայությունն ենք։ Արցախի ժողովրդի անվտանգությունը մենք առաջ ենք բերել որպես կարևորագույն խնդիր, այն ինչ այսօր գոյություն ունի իրականում, դա անվտանգային համակարգ է և պաշտպանական գծեր»,-ասաց նախարարը։

Նա նշեց, որ իրեն շատ հանգիստ է զգում, քանի որ հայկական դիրքերը շատ ավելի ամուր են, քանի որ հասարակության մեջ ընդհանուր առմամբ կոնսենսուս և ներքին ուժ կա։

«Հասկանում եմ, որ կա քաղաքական մրցակցություն և էական, կարևորագույն անվտանգային խնդիրն օգտագործվում է ներքին քաղաքականության մեջ։

Սրանից խուսափելը շատ դժվար է, բայց այս ամենի մեջ շատ ավելի էական է վստահ լինել, որ մեր ներգրավվումը բանակցությունների մեջ հիմնված է համազգային կոնսեսուսի վրա, որ անվտանգային խնդիրները խնդիրներն առաջնային են, Հայաստանը եղել և մնում է Ղարաբաղի երաշխավորը և սպառնալիքի լեզուն ժխտված է, ստատուսի և անվտանգության հարցերի շուրջ յուրաքանչյուր քննարկում հիմնված մեկ կարևորագույն սկզբունքի վրա՝ դիրքորոշումների այնպիսի համադրություն լինի, որտեղ մենք խստագույն պահպանում ենք ու ամրապնդում այն, ինչ առաջնային է»,-ասաց Մնացականյանը։

Նա հարց ուղղեց, թե ինչպես է հնարավոր, որ բանակցությունների ժամանակ այլ բան խոսվի և ժողովրդին այլ բան ներկայացվի, ապա ավելացրեց, որ ոչ արտաքին գործերի նախարարներն են հարցերի շուրջ պայմանավորվածություն ձեռք բերում, ոչ էլ նախարարները, հարցը որոշում են ժողովուրդները։

Աղբյուր` Փաստինֆո