Փաստ ինֆո

Մենք չենք կարող իրավիճակ ստեղծել, երբ մեր ժողովրդի համար անվտանգային համակարգը խոցելի դառնա։ Այս մասին լարգրողների հետ զրույցում ասաց ՀՀ արտաքին գործերի նախարար Զոհրաբ Մնացականյանը՝ անդրադառնալով Լավրովի հայտարարությանը։

Դիտարկմանը՝ արդյոք մտավախություն չկա, որ հայկական կողմին հնարավոր է պարտադրել, Զոհրաբ Մնացականյանն ասաց. «Սպառնալիքի լեզուն չի աշխատելու բանակցային գործընթացում։ Որպես կառավարության անդամ ինձ տրված է մանդատ՝ տանելու այդ աշխատանքը, ղեկավարության ղեկավարը վարչապետն է, որն ունի մանդատ ժողովրդի կողմից և սրանով ենք առաջնորդվում, երբ ներգրավվում ենք բանակցություններում։ Մենք չենք կարող ստեղծել իրավիճակ, երբ մեր ժողովրդի համար անվտանգային համակարգը դառնում է խոցելի»,-ասաց Զոհրաբ Մնացականյանը՝ ընդգծելով, որ Հայաստանի մեթոդը կառուցողական է, բայց դա չի նշանակում, որ կարող են աշխատել մի իրավիճակի մեջ, երբ ազգային շահերի համար ստեղծվում է վտանգ, անընդունելի իրավիճակ։

Անդրադառնալով հայ-ռուսական հարաբերություններին՝ ԱԳ նախարարը նկատեց՝ Հայաստանը Ռուսաստանի հետ դաշնակցային հարաբերություններ ունի, որի օրակարգը չափազանց մեծ է. «Եթե չունենանք խնդիրներ, ուրեմն ինչ-որ խնդիր ավելի խորքային կա։ Ունենք հարցեր, խնդիրներ, որոնք երկու դաշնակից, բարեկամ երկրներ միմյանց հետ քննարկում են։ Մենք համենայն դեպս այդ ոգով ենք մտադրված։ Ինչպես վերջին երկու տարվա ընթացքում ենք աշխատել, նույն վճռականությամբ շարունակելու ենքաշխատել երկկողմ օրակարգի ամբողջ ծավալի շուրջ։ Գազի հարցը մեզ համար չափազանց էական է և շարունակելու ենք քննարկել»,-հավելեց Զոհրաբ Մնացականյանը։

Աղբյուր` Փաստինֆո