Փաստ ինֆո

Վարչապետը հրապարակային ասում է, որ կոռուպցիոներներն իրենց թալանածը պետք է կոպեկ առ կոպեկ վերադարձնեն, բայց, Միքայել Մինասյանի հայտարարության համաձայն, կապի մեջ է մտնում, գործարք է առաջարկում մի անձնավորության, որն իր կողմից անվանվում է որպես կոռուպցիոներ, չնայած դատական որևէ որոշում չկա ։ Այստեղ պաշտոնական դիրքի չարաշահման հետ կապված խնդիրներ կան։ «Փաստինֆո»-ի հետ զրույցում ասաց քաղտեխնոլոգ Արմեն Բադալյանը։

Հիշեցնենք, որ Սուրբ Աթոռում ՀՀ նախկին դեսպան Միքայել Մինասյանը մայիսի 2-ին ֆեյսբուքյան իր էջում տեսանյութ է հրապարակել, որում պատմել է 2019 թվականին Հռոմում ԱԱԾ տնօրեն Արթուր Վանեցյանի հետ հանդիպման մասին՝ նշելով, որ նա Վանեցյանի միջոցով Փաշինյանն իրեն մեսիջ է փոխանցել:

Մասնավորապես` Նիկոլ Փաշինյանի անունից Ա.Վանեցյանը Միքայել Մինասյանին փոխանցել է, որ որոշակի գումար վճարելու ու առաջիկա տարիներին Հայաստան չգալու դեպքում Մինասյանի ու նրա հոր նկատմամբ բոլոր քրեական հետապնդումները կդադարեցվեն, սակայն Մինասյանն այս առաջարկը չի ընդունել։

Բադալյանն արձանագրեց, որ Մինասյանի հայտարարությանն այդպես էլ վարչապետ Փաշինյանի կողմից արձագանք չեղավ՝ նկատելով, որ լռությունը կարելի է ընկալել որպես համաձայնություն։

«Վարչապետի կողմից արձագանք չկա, նա վերջերս մի շարք կարևոր հարցերի չի արձագանքում։ Չնայած սովորաբար շոու պարունակող հարցերի համար ուղիղ եթեր է մտնում, սակայն Լավրովի հայտարարության, Գավառի դեպքերի, Միքայել Մինասյանի հայտարարության դեպքում ոչինչ չխոսեց։ Այս լռությունը կարող ենք ընկալել որպես համաձայնության նշան, հակառակ դեպքում գոնե վարչապետի մամուլի խոսնակն ինչ-որ կերպ պետք է արձագանքեր, հերքեր կամ էլ տեսակետ հնչեցներ, և սա հետաքննության առարկա պետք է դառնար»,-ասաց քաղտեխնոլոգը։

Մեր զրուցակցի խոսքով, Մինասյանի հայտարարությունից հետո հարցեր են առաջանում արդյոք սա միակ դեպքն է, թե այլ դեպքեր էլ են եղել, երբ վարչապետը նման գործարք է առաջարկել, միգուցե այլ դեպքեր էլ են եղել և ոմանք ընդունել են առաջարկը։

«Սա բավականին լուրջ մեղադրանք է, որը վարչապետը, կարծես, ուզում է ծածկադմփոց անել։ Սա նաև որոշակի հարցեր է առաջացրել իշխանության ներսում, քանի որ որոշ հասարակական դաշտի ներկայացուցիչներ արդեն հարցեր են բարձրացնում, որ կոռուպցիոներ փեսայի ասածը պետք է քննության առարկա դառնա»,-նշեց Բադալյանը։

Խոսելով ԱԱԾ նախկին տնօրեն Արթուր Վանեցյանի և Միքայել Մինասյանի հնարավոր համագործակցության մասին՝ քաղտեխնոլոգն ասաց, որ այդպիսի բան չի կարող լինել, քանի որ Վանեցյանը հրապարակային ասել է, որ Մինասյանի հետ չի համագործակցում։ Բացի այդ՝ իշխող քաղաքական ուժն Արթուր Վանեցյանին անընդհատ ցանկանում է կապել նախկին քաղաքական ուժի ու նրա ներկայացուցիչների հետ, որոնցից է նաև Միքայել Մինասյանը։

«Իշխանությունն Արթուր Վանեցյանին ցանկանում է կապել հին համակարգի հետ, քանի որ այսօր Հայաստանում դե յուրե պառլամենտական կառավարման համակարգ է, բայց դե ֆակտո կուսակցություններն ու նրանց գաղափարախոսությունները 10-րդ ական տեղն են գրավում և այստեղ անհատների պայքար է, իսկ այս պահին քաղաքական դաշտում որպես այդպիսին վարչապետին մրցակից անհատներ չկան։ Միակ թեկնածուն, որը քիչ թե շատ այս պահի դրությամբ կարող է մրցակցել դա ԱԱԾ նախկին տնօրենն է, եթե, իհարկե, որոշակի գրագետ քաղաքականություն իրականացնի, ինչն այս պահի դրությամբ չէի ասի, որ այդքան էլ լավ է իրականացնում, բայց, այնուամենայնիվ, միայն նա է, որ ինչ-որ չափով կարող է մրցակցել և հաղթել, այդ իսկ պատճառով էլ իշխող քաղաքական ուժն անընդհատ լրատվական դաշտ է մտցնում այն գաղափարը, որ Միքայել Մինասյանն ու Արթուր Վանեցյանը կարող են համագործակցել»,-ասաց Արմեն Բադալյանն ու ընդգծեց, որ սա ուղղակի սև PR տեխնոլոգիա է Արթուր Վանեցյանի դեմ։

Հեղինակ՝ Սոնա Գեւորգյան

Աղբյուր` Փաստինֆո