Փաստ ինֆո

Աուդիտորների պալատի նախագահ Նաիրի Սարգսյանը մանրամասն տեղյակ չէ «Գալաքսի» ընկերությունների խմբի համահիմնադիր Գուրգեն Խաչատրյանի շուրջ ծավալվող գործընթացներին։ «Փաստինֆո»-ի հետ զրույցում Նաիրի Սարգսյանն ասաց, որ չի կարող ասել՝ այս դեպքով ռեպրեսիաներ կիրառվում են, թե ոչ, սակայն արձագանքներն արդեն ուղիղ ազդեցություն են թողնում ներդրումների և արտասահմանյան ներդրողների որոշում կայացնելու վրա։

«Ներդրողի համար պետք է կայուն տնտեսական միջավայր, եթե կայուն չէ և նույնիսկ եթե լուրերը կեղծ են տարածվում, բայց համատարած են, միանշանակ ներդրումների վրա դրանք ազդեցություն թողնում են։ Արդարացվա՞ծ են ռեպրեսիաների հետ կապված այդ լուրերը և բողոքները, կոնկրետ «Գալաքսի» ընկերության մասով չեմ կարող ասել։ Ընդհանրապես բիզնեսի վրա չեմ կարող ասել ռեպրեսիաներ կիրառվում են և չեմ էլ կարող ասել, որ բիզնեսի հետ պետությունը տանում է գործընկերային հարաբերություններ։ Այսինքն` այս պահին միջակ վիճակում է գտնվում»,-նշեց Նաիրի Սարգսյանը։

Հարցին՝ պետությունը չի՞ միջամտում բիզնեսի գործունեությանը, Նաիրի Սարգսյանը նկատեց, որ պետությունը դրա համար ունի գործիքակազմ, այն է հարկային վարչարարությունը, ինչն ըստ Նաիրի Սարգսյանի՝ անարդյունավետ է իրականացվում. «Կարող ենք անունը դնել միջամտություն, երբ այսպես ասած այդ ստուգումները կատարվում են ոչ իրավաչափ ակտերի համապատասխան։ Շատ դեպքերում վարչարարությունից կախված տեղի են ունենում բիզնեսի աշխատանքին խոչընդոտող ստուգումներ, բայց համատարած ասել, որ ռեպրեսիա է, չեմ նկատել»,-ասաց Նաիրի Սարգսյանը։

Այնուամենայնիվ, եթե միջազգային հանրությունն այս ամենին բացասական գնահատական տա, նշանակում է՝ դա ներդրումների վրա ուղղակիորեն ազդեցություն է ունենալու։ Ընդ որում` ոչ միայն պետք է աշխատել արտասահմանից ներդրումներ ներգրավելու ուղղությամբ, այլև առաջին հերթին տեղի ներդրողներին։ Նաիրի Սարգսյանը գտնում է, որ պետք է անենք ամեն ինչ, որ գումարը թողնենք Հայաստանում և բիզնեսի սեփականատերը չմտածի գումարները Հայաստանից տանելու մասին. «Եթե չունենանք հիմնավորված թափանցիկ հարկային վարչարարություն, որպեսզի ներդրողը կարողանա տնտեսական արդյունավետ որոշումներ կայացնել, ուղղակի ներդրումներ չենք ունենա։ Այս պահի դրությամբ թափանցիկությունն ու արդյունավետությունն իսպառ բացակայում են և իմ գնահատմամբ Հայաստանում շատ դժվար է ներդրումների իրականացման համար որոշումների իրականացումը»,-ասաց Նաիրի Սարգսյանը։

Վերջինս ընդգծեց՝ Հայաստանը պետք է վարի թափանցիկ քաղաքականություն և հարկային վարչարարություն։ Թափանցիկությունն այս աստիճանի է պետք հասցնել, որ եթե նույնիսկ առկա է կարծիք, որ բիզնեսի նկատմամբ ռեպրեսիաներ են կիրառվում, ներդրողը, երկու կողմին լսելով, պետք է կարողանա որոշում կայացնել՝ արդյոք ճշմարիտ են այդ լուրերը, թե ոչ։

Հիշեցնենք, որ ապրիլի 28-ին «Գալաքսի» ընկերությունների խմբի համահիմնադիր, Ucom ընկերության տնօրենների խորհրդի նախագահ Գուրգեն Խաչատրյանը հայտարարել էր, որ երկրի բարձրաստիճան պաշտոնյանների մակարդակով ուղիղ և անուղղակի պահանջ է դրվել իր առջև օտարելու Ucom-ը։

«Տեսնելով, որ սաբոտաժը արդյունք չի տվել և մենք շարունակում ենք տիրապետել իրավիճակին, վերջին օրերին արդեն ուղիղ պահանջ է ներկայացվել Ucom-ն օտարելու, իսկ չհամաձայնվելու դեպքում հստակ հայտնել են, որ կարճ ժամկետում ինձ մեղադրելու են առանձնապես ծանր հանցագործության կատարման մեջ և կալանավորելու, որին հետևելու է նույնաբնույթ գործողությունների իրականացումը եղբորս, ընտանիքի այլ անդամների, ազգականներիս, մտերիմներիս, ինչպես նաև մեզ հետ առնչվող այլ անձանց նկատմամբ»,- հայտարարել էր Խաչատրյանն ու նշել, որ ճնշումներին տեղի չենք տալու ու «Ucom-ը չի վաճառվելու։

Այս հայտարարությանը հաջորդեցին իրավապահների լայնածավալ քննչական գործողությունները՝ խուզարկություններ են կատարվել Խաչատրյանների բնակարաններում, բիզնես-գրասենյակներում։ Բացի այդ՝ նոր մեղադրանք է առաջադրվել Գ.Խաչատրյանին ու կալանավորելու միջնորդություն ներկայացվել դատարան, որը բավարարվել է։

Ավելի վաղ հայտնել էինք, որ մեր տեղեկություններով Հայաստանի համար առանցքային նշանակություն ունեցող մի քանի եվրոպական պետություն նոտա են ուղղել Հայաստանին՝ անհանգստություն հայտնելով Գուրգեն Խաչատրյանի նկատմամբ իրականացվող գործողությունների կապակցությամբ։ Հայտնի է դարձել, որ Գուրգեն Խաչատրյան, իր խորհրդականների հետ միասին, որոշ ժամանակ առաջ մասնավոր հանդիպում է ունեցել Հայաստանի բարեկամ եվրոպական առանցքային մի երկրի արտակարգ եւ լիազոր դեսպանի հետ վերջինիս նախաձեռնությամբ: Գուրգեն Խաչատրյանի հետ հանդիպման ցանկություն են հայտնել մի շարք այլ երկրների դեսպաններ եւս: Հանդիպումները տեղի են ունեցել բավական ուշ ժամերի, մինչեւ կեսգիշեր: Դեսպանների նման ցանկությունները պայմանավորված են այն հանգամանքով, որ տարբեր երկրների մակարդակով մտահոգություններ են ձեւավորվել Հայաստանում տիրող իրավիճակով եւ բիզնեսի հանդեպ կիրառվող ռեպրեսիաների հետ կապված։

Աղբյուր` Փաստինֆո