Փաստ ինֆո

Օրեր առաջ Գավառում տեղի ունեցած քննիչի ու նրա ապագա փեսայի սպանությունները մնացել են չբացահայտված, թեեւ քրեական գործով մեղադրյալների թիվը հասնում է 15-ի, որեւէ մեկի մեղադրանք չի առաջադրվել նաեւ ապօրինի զենք պահելու համար, թեեւ մեր տեղեկություններով, առնվազն երկու հոգու մոտ ինքնաձիգ է եղել:

Հիշեցնենք, որ ապրիլի 28-ին Գավառում տեղի է ունեցել փոխհրաձգություն, որի ժամանակ սպանվել է երկու երիտասարդ՝ Նորատուսի բնակիչ Վ. Ավետիսյանը` նորատուսցի արջը և Գավառի բնակիչ՝ ՔԿ Զինվորական քննչական գլխավոր վարչության քննիչ Զ. Պարոնիկյանը, 6 հոգի տեղափոխվել բժշկական կենտրոն: Նշենք, որ նորատուսցի արջն ուներ ընտրյալ` սպանված քննիչի քույրը:

Սպանություններից հետո դանակով ու մահակներով զինված անձինք հարձակվել են Գավառի հիվանդանոց, որտեղ այդ պահին հսկողություն էին իրականացնում ոստիկանության ծառայողները, այն ամբողջությամբ տակնուվրա արել, փորձել սպանել միջադեպի մասնակիցներից 3-ին՝ նրանց մեղադրելով իրենց հարազատների սպանության մեջ։ Դեպքերի առթիվ հարուցվել էին քրեական գործեր՝ սպանության, ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, պահելու, սպանության փորձի, գույքը դիտավորությամբ ոչնչացնելու, զանգվածային անկարգությունների համար, ստեղծվել քննչական խումբ:

Հայտարարվեց, որ քրեական գործի շրջանակներում մեղադրանքներ են առաջադրվել, սակայն բացահայտումները սահմանափակվում են հիվանդանոցի վրա կատարված դրվագի շրջանակներում, ինչի տեղի է ունեցել հենց իրավապահերի աչքի առաջ, սակայն դրան նախորդած սպանությունների, բանուկ հատվածում փոխհրաձգության հեղինակները մնացել են չբացահայտված: Այսպես մեղադրանք է առաջադրվել 15 անձի՝ անկարգություններին մասնակցելու, սպանության փորձ կատարելու համար: Նրանցից 13 -ը կալանավորվել են:

Ինչպես արդեն հայտնել ենք` զինված միջադեպի պատճառը Գավառի ակումբում նորտուսցի ու Գավառի դեռահասների միջեւ առաջացած տարաձայնությունն է, տղաները չեն կարողացել հարթել տեւական ժամանակ շարունակվող լարվածությունը, միջամտել են մեծերը, պայմանավորվել հանդիպել, սակայն զրուցելու փոխարեն գործի են դրվել ինքնաձիգերը: Դեպքի վայրում հայտնաբերվել է ավելի քան 50 պարկուճ, օգտագործվել է առնվազն երկու ինքնաձիգ, բայց նրանց հայտնաբերելու, մեղադրանք առաջադրելու մասին խոսք անգամ չկա, ինչե մեծացնում է վենդետայի վտանգը:

Հեղինակ` Իզաբել Սահակյան

Աղբյուր` Փաստինֆո