Փաստ ինֆո

Հայաստանում հաստատված արտակարգ դրության եւ կարանտինի պայմաններում գործնականում պետությունը ձախողել է իր խնդիրը եւ կատարել բացառապես հրշեջի ֆունկցիա:

«Փաստինֆո»-ի հետ զրույցում նման կարծիք հայտնեց քաղաքագետ Երվանդ Բոզոյանը՝ անդրադառնալով այն գործողություններին, որոնք պարտավոր էր կատարել պետությունը կորոնավիրուսով պայմանավորված արտակարգ դրության պայմաններում եւ այն իրավիճակին, որն այսօր փաստացի առկա է երկրում:

«Առողջապահության նախարարը փաստացի զբաղված է եղել եւ զբաղված է այն հարցով, թե հիվանդներին որտեղ բաշխել, այսինքն, լուրջ մակարդակի ստրատեգիական միջոցառումներ , թե ինչպես անել, թեստավորման ճանապարհով օջախները բացահայտել, չեն եղել, գիտակցությունն էլ չի եղել»,-կարծում է Երվանդ Բոզոյանը:

Ըստ քաղաքագետի, նույնիսկ քիչ թե շատ բացատրելի ձեւակերպումներ չեն հնչել պետական մակարդակում ՝ իրավիճակը հաղթահարելուն ուղղված քայլերի վերաբերյալ, փոխարենը տեսնում ենք պրիմիտիվ, վերացական ու լոզունգային մակարդակի ձեւակերպումներ: «Մենք տեսանք , որ այս կարանտինը հանուն կարանտինի է, այսինքն, տնտեսությունը կանգնած էր, մարդիկ մեծամասամբ տնից դուրս չէին գալիս եւ վերջ, որեւէ քայլ չեղավ: Նույնիսկ թիրախային խմբերի աշխատողների՝ բժիշկների, վաճառողների, բանկային աշխատողների թեստավորում չեղավ»,-բացատրեց քաղաքագետը:

Հիշեցնենք, որ մայիսի 4-ից արտակարգ դրության հիմնական սահմանափակումները վերացվում են, կսկսեն աշխատել բացօթյա սրճարանները, վարսավիրանոցները, խանութները: Սրան զուգահեռ կորոնավիրուսով վարակվածության դեպքերն են ավելանում: Հայաստանում մայիսի 2-ի դրությամբ նոր կորոնավիրուսով վարակվելու 125 նոր դեպք է գրանցվել, հաստատվել է կորոնավիրուսի 2273 դեպք, իսկ առողջապահության նախարարը տեղեկացրել է, որ ծանր վիճակում է 63 քաղաքացի, ծայրահեղ ծանր՝ 28:

Քաղաքագետն ասում է՝ արտակարգ դրության ռեժիմին անձամբ ինքը կողմ էր, բայց կարեւոր է հասկանալ, որ կարանտինը եւ արտակարգ դրությունն ինքնանպատակ չեն լինում: «Կարանտինը դա միջոց էր, որպեսզի այդ ալիքը կոտրվեր, միաժամանակ պետությունը քաղաքացիների ինքնամեկուսացման ժամանակահատվածն օգտագործեր եւ աշխատանք տաներ ՝ գտնելու վարակի թիրախային խմբերը, որպեսզի կարանտինի ավարտից հետո տնտեսության հիմնական ոլորտները վերաբացեր»: Սակայն, ըստ քաղաքագետի, իրական հակաճգնաժամային կառավարում Հայաստանում չի եղել, իսկ պատճառը մեկն է՝ պոպուլիստական իշխանությունը:

«Հատկապես ճգնաժամային իրավիճակներում պոպուլիստական իշխանությունը հակացուցված երեւույթ է եւ այս իշխանությունը, քանի որ ոչ մի բանի ունակ չէ, հիմա ստիպված գնում է տնտեսության բացմանը, քանի որ հակառակը պարզապես կբերի սոցիալական կոլապսի, մյուս կողմից էլ, քանի որ ինքը որեւէ աշխատանք չի տարել եւ այն հանգամանքը, որ մենք չգիտենք, թե այդ հիվանդությունը, որքան և որտեղ է տարածված , հանգեցնելու է ավելի ծանր իրավիճակի»,-շեշտում է Երվանդ Բոզոյանը՝ հավելելով, որ մեր երկրում որեւէ կերպ չի քարոզվում նոր ապրելակերպը եւ մենք տեսնում ենք այսպես ասած բիոլոգիական ռումբեր՝ ի դեմս բազմամարդ հավաքների:

«Նախկինում շատ սխալներ է եղել, ես դրանց չեմ ուզում վերադառնալ, բայց նույնիսկ այսօր միասնական կենցաղային վարվելակերպ չի քարոզվում, պառակտված հասարակություն է, որտեղ երկրի ղեկավարին մի մասը մոլեռանդ հավատում է, մյուս մասը՝ ատում: Այս պայմաններում հնարավոր չէ պայքարել այս արհավիրքի դեմ եւ կարելի է ասել , որ այս կարանտինը ձեւական բնույթ ունեցավ»:

Քաղաքագետը մտահոգություն ունի, որ սահմանափակումների վերացումից հետո կորոնավիրուսի դեպքերը Հայաստանում երկրաչափական պրոգրեսիայով են աճելու եւ շատ կարճ ժամանակ անց առողջապահական համակարգը կաթվածահար է լինելու , իսկ երկիրը հայտնվելու է հումանիտար աղետի առաջ: «Կրկնում եմ, այս ամենի պատճառը ոչ էֆեկտիվ հակաճգնաժամային մենեջմենտի բացակայությունն է, դա քաղաքագիտական նորմ է, պոպուլիստական իշխանությունները չեն կարող ունենալ այդպիսի մենեջմենտ»,-եզրափակեց Երվանդ Բոզոյանը:

Աղբյուր` Փաստինֆո