Փաստ ինֆո

Երևանի ընդհանուր իրավասության դատարանը՝ նախագահությամբ դատավոր Գոռ Թորոսյանի, վերադարձրել է բժիշկ-ուրոլոգ Գևորգ Գրիգորյանի հայցադիմումն ընդդեմ ՀՀ փոխվարչապետ Տիգրան Ավինյանի կնոջ՝ Մարիամ Պահլավունու: Այս մասին տեղեկանում ենք դատական տեղեկատվական համակարգից:

Նշենք, որ Գրիգորյանը ներկայացված հայցադիմումը վերաբերում էր հրապարակայնորեն արտահայտված վիրավորանքից պատիվը և արժանապատվությունը պաշտպանելու պահանջի մասին:

Հայցադիմումի պատճառ էր դարձել սոցիալական ցանցում Գրիգորյանի մասին գրառումը, որի մեկնաբանություններում Ավինյանի կինը գրել էր՝ «Առանց դրա էլ բոլորը գիտեն ում շունն ա»: Մեկնաբանությանը հաջորդել է Գրիգորյանի ֆեյսբուքյան գրառումը, որտեղ վերջինս մեջբերել էր Հերդերի հայտնի խոսքերը՝ յուրաքանչյուր կնոջ սխալի մեջ տղամարդու մեղք կա: Գրիգորյանը նաև շել էր, որ, եթե Ավինյանը չի կարողացել զսպել իր կնոջ ճառերը, և արդյունքում վերջինիս կինը հանդես է եկել ոչ հարիր բառամթերքով սոցիալական ցանցում՝ հասցեագրված օտար տղամարդու, ինչը լայն տարածում է ստացել լրատվական դաշտում: «Ակնկալում եմ ձեր կողմից տղամարդուն վայել կեցվածք, պատասխանատվություն՝ սեփական կնոջ բառամթերքի համար: Այլ պարագայում հարցը կլուծվի իրավական ճանապարհով»,- նշել էր Գրիգորյանը:

Դատարանը որոշել է վերադարձնել հայցադիմումը, քանի որ այն որոշակի թերություններ է ունեցել: Դատարանն արձանագրել է, որ հայցվորը հայցադիմումին կից ներկայացվել է 20,000.00 ՀՀ դրամի չափով պետական տուրքի վճարման անդորրագիր՝ 24,000.00 ՀՀ դրամի փոխարեն:Ինչպես նաև դատարանն արձանագրել է, որ հայցվորը հայցադիմումին կից չի ներկայացրել հայցադիմումի օրինակը և դրան կից փաստաթղթերի պատճենները՝ գործին մասնակցող անձանց թվին համապատասխան: Նշված թերությունները հաշվի առնելով՝ դատարանը որոշում է կայացրել վերադարձնելու ներկայացված հայցադիմումը, միևնույն ժամանակ նշելով, որ եռօրյա ժամկետում թերությունները շտկելու և այն դատարան կրկին ներկայացվելու դեպքում հայցադիմումը համարվում է առաջին ատյանի դատարան ներկայացված այն սկզբնապես ներկայացնելու օրը: Բացի այդ՝ որոշումը կարող է բողոքարկվել Վերաքննիչ դատարան: Դատական տեղեկատվական համակարգում առկա տեղեկատվության համաձայն՝ հայցադիմումը վերադարձնելու որոշում կայացվել է ապրիլի 17-ին, սակայն նոր հայցադիմում մուտքագրելու կամ վերաքննիչ բողոք ներկայացնելու մասին տեղեկատվությունը բացակայում է:

Աղբյուր` Փաստինֆո