Փաստ ինֆո

Երկու տարվա ընթացքում վարչապետի գլխավորությամբ իշխող քաղաքական ուժի «ասֆալտին փռել», «պատին սվաղել», «սամասուդ անել» հոգեբանությունն արդեն իջել է դեպի հասարակության ավելի ցածր շերտեր և եթե հարց են ունենում, փորձում են այդ մեթոդաբանությամբ լուծել։

«Փաստինֆո»-ի հետ զրույցում այս մասին ասաց քաղտեխնոլոգ Արմեն Բադալյանը՝ անդրադառնալով Գավառի դեպքին։ Հիշեցնենք՝ Գավառում տեղի ունեցած փոխհրաձգության ժամանակ սպանվել է երկու անձ՝ քննիչն ու նրա փեսան, մի քանի այլ անձ վնասվածքներով տեղափոխվել են բժշկական կենտրոն։ Սպանվածների հարազատները՝ 400-500 հոգով, հարձակվել են Գավառի հիվանդանոցի վրա, որտեղ գտնվում էին փոխհրաձգության մասնակիցներից երկուսը՝ սպանության համար վրեժխնդիր լինելու նպատակով։

Ըստ նրա՝ Գավառի դեպքը նաև լուրջ հոգեբանական քննության պետք է ենթարկվի, քանի որ այստեղ գլուխ է բարձրացնում գավառական կամ համայնքային հարենասիրությունը, իսկ դա, քաղտեխնոլոգի խոսքով, լինում է միայն այն դեպքում, երբ պետականությունը, որպես այդպիսին, դադարել է դե յուրե կամ դե ֆակտո գոյություն ունենալ. «Այստեղ պետք է ուսումնասիրվի միայն այդ երկու համայնքների միջև կան ինչ-որ խնդիրներ, թե ուրիշ համայնքների միջև նույնպես կան խնդիրներ: Այսինքն` դա մշակութաբանական, հոգեբանական վերլուծության խնդիր է, նաև կրիմինալ հոգեբանության խնդիր է, որովհետև այդտեղ վենդետայի հարց կար: Այդ մարդիկ չէին հավատում արդար դատական համակարգին: Այստեղ էլ ուրեմն խնդիրներ կան դատական համակարգի հետ կապված:

Այսինքն` Գավառի դեպքը խորը հիվանդություն ցույց տվեց, որը պետք է ուսումնասիրվի և լուծվի: Ի վերջո` չմոռանանք նաև վարչապետի հայտնի հայտարարությունը, որ երկու տարի առաջ ասել էր կառավարության դուռը կոտրողներին: Նա ասել էր իրենց դուռն է, կուզեն կջարդեն, չեն ուզի չեն ջարդի: Նորատուսցիներն էլ մտածեցին, որ Գավառի հիվանդանոցն իրենցն է, կուզեն կջարդեն, չեն ուզի չեն ջարդի»,-նշեց Արմեն Բադալյանը:

Ըստ նրա՝ հաջորդ խնդիրը կապված է ոստիկանության հետ: «Իհարկե մինչ այս էլ ոստիկանությունը ներքաշվել է քաղաքական գործընթացների մեջ, բայց վերջին երկու տարվա ընթացքում դա բացահայտ շոու տարբերակով է ներքաշվել և բնականաբար նույնպես ունեցել է իր նշանակությունը: Հատկապես, երբ այնպիսի ոստիկանապետ ես նշանակում, որն ավելի շատ քեզ պետք է ծառայի, այլ ոչ թե կրմինալ կառույցի դեմ գործողություններ պետք է իրականացնի:

Բնականաբար նա մտածում է ինչպես քեզ դուր գալ, այլ ոչ թե կատարել գործողություններ, որ կարող է քեզ դուր չգալ, բայց հասարակության համար պիտանի լինել; Այսինքն ոստիկանությունը նաև իր տեղում չի եղել»,-ասաց Արմեն Բադալյանը:

Հեղինակ՝ Հասմիկ Կոշկարյան

Աղբյուր` Փաստինֆո