Փաստ ինֆո

ՀՀ վարչապետի նախկին խորհրդական Արսեն Խառատյանը հայցադիմում է ներկայացրել՝ ընդդեմ ՀՀ նախկին վարչապետ Հրանտ Բագրատյանի՝ զրպարտության համար: «Փաստինֆո»-ն դատական տեղեկատվական համակարգից տեղեկացավ, որ Խառատյանը Բագրատյանից պահանջում է հրապարակայնորեն հերքել զրպարտություն հանդիսացող փաստացի տվյալները և ներողություն խնդրել: Հայցադիմումը դատարան մուտք է եղել ապրիլի 27-ին և նույն օրը մակագրվել Երևանի ընդհանուր իրավասության դատարանի դատավոր Երեմ Եսոյանին:

Նշենք, որ Հրանտ Բագրատյանն ապրիլի 8-ին ֆեյսբուքյան գրառում էր կատարել կապված Արցախում նախագահական և խորհրդարանական ընտրությունների հետ, որտեղ շոշափվել էր նաև Արսեն Խառատյանի անունը: Գրառման՝ Խառատյանին առնչվող հատվածում Բագրատյանը նշել էր.«ՀՀ-ից ժամանած սորոսական էմիսարները, ի դեմս Արսեն Խառատյանի, Մանվել Սարգսյանի և այլոց, օգտագործելով, այսպես կոչված՝ Արցախի հեղափոխական կուսակցության «ակտիվիստներին» (թվով 100-200 մարդ), նախագահ Արթուր Օսիպյանին՝ մեկ այլ սորոսական, ընտրությունները հայտարարում են կեղծված, պահանջում են դրանք չեղարկել, նոր ընտրություններ անցկացնել, և այլն։ Պահանջում են նաև այս պահին գործող ԱՀ նախագահ Բակո Սահակյանի հրաժարականը։
Բայց չէ՞ որ ընտրությունները դեռ չեն ավարտվել։ Այս ի՞նչ եք անում։ Հերթական անգամ կայացած, ձևավորված պետությո՞ւն եք քայքայում։ Սորոսական lragir.am կայքը հենց օդի միջից, իր սովորության համաձայն, հոդվածներ է տպում առ այն, թե՝ ի՜նչ վատ ընտրություններ էին Արցախում... Չկա գեթ մեկ լուրջ փաստ»:

Աղբյուր` Փաստինֆո