Փաստ ինֆո

Ազգային ժողովի աշխատակազմի ղեկավարի նախկին տեղակալ Արսեն Բաբայանը պահանջում է պատասխանատվության ենթարկել պատգամավոր Հրաչյա Հակոբյանին և այս կապակցությամբ դիմում է ներկայացրել ՀՀ Գլխավոր դատախազություն:

Նա նշում է, որ դատախազությունն առնվազն պետք է ստուգի Հրաչյա Հակոբյանի հայտարարությունը:

Հիշեցնենք, որ Հրաչյա Հակոբյանն իր ֆեյսբուքյան էջում գրել էր, որ ԱԱԾ նախկին տնօրեն Արթուր Վանեցյանը իր կոռուպցիոն «արիշվերիշներից» ուշադրություն շեղելու համար հարց է հնչեցնում՝ վարչապետ Նիկոլ Փաշինյանին ուղղված:
«Հարցնում է, թե էդ ինչե՞ր եք բանակցում Ղարաբաղի մասով: Կարծում եմ ԱԳՆ-ն եւ վարչապետի խոսնակը սպառիչ պատասխան են տվել այդ հարցերին: Բայց քանի որ հետաքրքիր հարցերի սեզոնը բացվել է, ես էլ իմ հերթին եմ ուզում հարց տալ Արթուր Վանեցյանին: Իսկ կարո՞ղ է մի օր պարզվել, որ Վանեցյանը ԱԱԾ տնօրենի պաշտոնից հեռացվել է օտարերկրա հատուկ ծառայությունների կողմից հավաքագրված լինելու պատճառով: Կարո՞ղ է պարզվել, որ վարչապետ Նիկոլ Փաշինյանը փաստերի ճնշման ներքո նրան ստիպել է խոստովանել օտերարկրյա հատուկ ծառայությունների կողմից հովաքագրված լինելու փաստը:
Իսկ կարո՞ղ է պարզվել, որ Փաշինյանը պարզել է նաեւ հավաքագրման պայմանները: Օրինակ՝ կարո՞ղ է պարզվել, որ Շվեյցարիայում գտնվող Արթուր Վանեցյանի ոչ միայն վարչապետի եւ ՀՔԾ պետի հետ ունեցած հեռախոսազրույցներն են գաղտնալսվել, այլեւ նրա եւ Միքայել Մինասյանի բանակցությունները, թե ինչպես է Վանեցյանը Մինասյանից սեփականությունները շորթում՝ նրան ու նրա ընտանիքի անդամներին քրեական պատասխանատվության չենթարկելու, եւ հետագայում երիտհանրապետականների «նոր իշխանություն» հաստատելու հեռանկարի դիմաց:

Գիտեմ գիտեմ: Շատերը կասեն, որ եթե օտարերկրյա գործակալի թեմա կա, դա պետք է լուծվի քրգործերի կոնտեքստում: Բայց համաշխարհային պրակտիկան էսպես է. օտարերկրյա գործակալներին բռնում եւ դատում են, երբ ուզում են հավաքագրող երկրի հետ հարաբերություն փչացնել: Իսկ եթե ոչ, գործակալին չեզոքացնում են, որ նա ուղղակի չկարողանա գործել: Իսկ Հայաստանը չի ուզում հարաբերություններ փչացնել ոչ մի երկրի հետ»,-գրել էր Հակովյանը:

«Շատ տարօրինակ կերպով տեսանք, որ Գլխավոր դատախազության դռները փակ են, այսինքն արտակարգ դրության ժամանակ դատախազության դռները փակ են: Այսօր ոչ աշխատանքային օր է, բայց դատախազությունը հսկող տարածք է, դատախազության ներսում միշտ ոստիկանության աշխատակիցներ կան և երբեք դատախազության դուռը փակ չի լինում»,-այս մասին այսօր լրագրողների հետ ճեպազրույցում ասաց Արսեն Բաբայանն ու շեշտեց, որ կանխատեսելի է, որ դատախազությունը կարող է չաշխատել և հենց դրա համար էլ մինչ իր գալը էլեկտրոնային փոստով ուղարկել է դիմումը:

Նա շեշտեց, որ վստահ է վերջին շրջանում Հրաչյա Հակոբյանի բոլոր գրառումներն արված են ՀՀ վարչապետ Նիկոլ Փաշինյանի կողմից: Ապա ավելացրեց, որ լինելով ԱԺ պատգամավոր՝ Հակոբյանը զրպարտչական հայտարարություն է անում և ձևակերպում է այնպես, որ իր կարծիքով իրեն հնարավոր չլինի պատասխանատվության ենթարկել զրպարտչության համար:

«Ինչու՞ հենց Հրաչյա Հակոբյանը, քանի որ բոլորս գիտենք, որ նա վարչապետի ընտանիքի անդամն է և հանրության մոտ կարող է տպավորություն ստեղծվել, որ եթե վարչապետ Փաշինյանի ընտանիքի անդամն է խոսում նման բաների մասին, ուրեմն ինքը տեղեկացված է: Սակայն ամբողջ հայտարարությունը դեղին մամուլին հարիր հայտարարություն է»,-ասաց Բաբայանը:

Աղբյուր` Փաստինֆո