Փաստ ինֆո

Քրեական վարույթում ունենք ոսկե կանոն՝ անձն անմեղ է, քանի դեռ նրա մեղավորությունը հաստատված չէ օրինական ուժի մեջ մտած դատավճռով, բայց ինքներս էլ ականատես ենք բազում անձանց կողմից նախնական հրապարակումներին: Այս մասին լրագրողների հետ ճեպազրույցում ասաց ՀՀ գլխավոր դատախազ Արթուր Դավթյանը՝ անդրադառնալով ՀՀ վարչապետի խոսնակի հայտարարությանը:

Դավթյանը նշեց, որ կարևոր է, թե ինչ մշակույթ է ձևավորվելու, թե ում հայտարարությունն ինչ ընկալում պետք է ունենա հանրության մեջ:
«Եթե դրա մասին պաշտոնական աղբյուրներն ասում են՝ մինչև օրինական դատավճռով ուժի մեջ մտնելը,ուրեմն հանրության համար դա այդպիսին է: Եթե դրանք այդ պաշտոնական հենքն իրենց հիմքում չունեն, ուրեմն դրանք անձանց կարծիքներն են, որոնք երբեմն մեկնաբանվում են նաև ազատ խոսքի տրամաբանության մեջ և այլն» ,- ասաց գլխավոր դատախազը:

Ինչ վերաբերում է դատախազության կողմից X անձին մեղադրանք առաջադրելու մասին տեղեկատվության հրապարակմանը, Դավթյանը նշեց, որ առնչվում են երկու կարևոր խնդրի. մի կողմից հանրության տեղեկություն ստանալու բարձր արժեք ունեցող իրավունքն է, մյուս կողմից՝ մասնավոր՝ անմեղության կանխավարկածի կամ մասնավոր կյանքի իրավունքն է և այդտեղ պետք է պահպանվի ոսկե միջինը:

Նա արձանագրեց, որ տեղեկություններ է տրամադրվում, որոնք դատավարական փաստաթղթերում ամրագրված են՝ հարուցվել է քրեական գործ, անձը որպես մեղադրյալ է ներգրավվել, բայց բոլոր ձևակերպումները տրվում են այնպես, որ սրանք մինչդատական վարույթին համապատասխան տեսակետն են:

Աղբյուր` Փաստինֆո