Փաստ ինֆո

ԱԺ «Լուսավոր Հայաստան» խմբակցության ղեկավար Էդմոն Մարուքյանն այսօր ԱԺ նիստի ժամանակ կրկին հետաքրքրվել է, թե ինչու կառավարությունը ՀՀ քաղաքացիների վերջին 2 տարիների խնայողություններից չի ուզում աջակցություն տրամադրել ՀՀ քաղաքացիներին, որպեսզի վճարեն կոմունալները, սնունդ գնեն և այլն:

«Մոտավորապես 5000 ընտանիք հիմա խնդրի առաջ է կանգնած: Մենք այս հարցը բարձրացրել ենք, փողի տեղը ցույց ենք տվել, ցույց ենք տվել միջազգային փորձը, միջազգային փորձն ըստ ամեն երկրի ՀՆԱ-ի ծախսերի: Մենք ձեզնից՝ որպես կառավարության ներկայացուցիչ, ուզում ենք հարց պատասխանը ստանալ, թե ժողովրդի գումարից ինչո՞ւ չեք աջակցում ՀՀ ժողովրդին, արդյոք մեր առաջարկությունը քննարկվում է Կառավարությունում և երբ եք այն բավարարելու կամ պաշտոնական հաղորդագրությամբ ու հիմնավորումներով մերժելու»,-դիմելով ՀՀ Ֆինանսների նախարար Ատոմ Ջանջուղազյանին ասաց Մարուքյանը:

Ջանջուղազյանը նշեց՝ վստահ չէ, որ Մարուքյանը նպատակ է հետապնդում ստանալ հարցի պատասխանը, քանի որ նա այն ստացել է. «Առնվազն տպավորություն է ձևավորվում, որ Ձեզ հետաքրքրում է գործընթացը այդ հարցի ձևակերպման և այդ հարցի վերաբերյալ պնդումներ անելով այդ պնդումների նկատմամբ ուշադրությունը չկենտրոնացնելու նկատառմամբ: Սա կարող է սուբյեկտիվ ընկալում է, բայց առնվազն այդպիսի ընկալում գոյություն ունենալու իրավունք ունի»:

Նախարարի խոսքով, հանրությանն ջակցելու համար Կառավարություն միջոցառումներ իրականացնում է և անհասցե ու չհիմնավորված տեղում վճարված գումարը շատ ավելի բացասական ազդեցություն ու արդյունք ունի:

«Կառավարությունն իր տրամադրության տակ 100 մրդ դրամ ունի: Դուք ընդգծում եք, որ Կառավարությունն իր կողմից չկատարած կապիտալ շինարարության ծրագրերի արդյունքում գոյացած խնայողությունները, բայց ես ուզում եմ ևս մեկ անգամ մի հարց մանրամասնել: Իրականում այդ կապիտալ ծրագրերի չկատարումների զգալի մասն արտաքին աջակցությամբ իրականացվող ծրագրեր են և դրանք չէին կարող մաս լինել պայմանական ասած ազատ մնացորդի, որովհետև այդ միջոցները ՀՀ Կառավարության համար հասանելի են դառնում այն ժամանակ, երբ այդ ծրագրերն իրականացվում են»,-ասաց Ջանջուղազյանը:
Էդմոն Մարուքյանն ասաց, որ չի հասկանում՝ ինչ է նշանակում, որ առաջարկը հասցեական չէ, երբ ինքը խոսում է 470 հազար թոշակառուների մասին. «Ինչը՞ հասցեական չէ, թոշակառուի տան տեղն էլ գիտեք, ինչը՞ չի հասցեական: Ես չգիտեմ՝ ոնց եք ասում, որ թիրախային է աջակցությունը, երբ վարչապետն ուղիղ եթերում ասում է, որ չենք կարողանում տեղորոշել կարիքավորին: Իրար հետ գոնե քննարկեք, որ ձեր խոսքերը համընկնեն իրար հետ: Երեկ մեր վարչապետն ասել է, որ չենք կարողանում կարիքավորին տեղորոշենք, Դուք հիմա ասում եք թիրախային ենք աշխատում, դուք անհասցե առաջարկ եք անում: Ես անհասցե առաջարկ չեմ անում»:

Անդրադառնալով հարցին, որ միջոցներն ազատ չեն ու դրանց օգտագործումը սահմանված է միջազգային պարտավորություններով, ԼՀԿ ղեկավարն ասաց, որ բացի այդ պայմանավորվածություններով նախատեսված գումարից նաև ազատ գումար կա, որից պետք է իր նշած ծախսերն արվեն:
Ֆինանսների նախարարը ևս մեկ անգամ շեշտեց, որ Մարուքյանի հարցի պատասխանը բազմիցս հնչել է, հետևաբար ինքն իրեն կարող է թույլ տալ եզրակացնել, որ Մարուքյանին իրենց կողմից տրված պատասխանը դուր չի գալիս:

«Իսկ ինչ վերաբերում է նրան, որ մենք իրար հետ համաձայնեցնենք մեր գործողություները, ես նույնպես ասում եմ, որ, այո, մենք հասցեական ենք ուզում իրականացնել մեր գործողությունները: Դուք ասում եք՝ գումարի տեղը ցույց եք տվել, ասում ենք շնորհակալ ենք, ով ցույց է տալիս շնորհակալ ենք, մենք բոլորը հաշվի ենք առնում, չքննարկվող առաջարկ չկա»,-ասաց նախարարը:

ԱԺ «Իմ քայլը» խմբակցության պատգամավոր Միքայել Զոլյանն էլ ընդգծեց՝ կիսում է այն կարծիքը, որ Էդմոն Մարուքյանի առաջարկը պոպուլիստական էր, շահարկում էր և հատուկ արված էր նրա համար, որպեսզի այն մերժվի. «Ես համոզված եմ, որ եթե դուք այստեղ ասեիք, որ ուզում եք թոշակառուներին գումար տալ, պարոն Մարուքյանը բազմաթիվ փաստարկներ կբերեր, թե ինչու դա ոչ մի դեպքում չի կարելի անել»:

Աղբյուր` Փաստինֆո