Փաստ ինֆո

Երկու տարվա ընթացքում մենք լսել ենք բազմաթիվ ամպագոռգոռ արտահայտություններ, որոնցից ոչ մեկն իրականություն չի դարձել և ես համոզված եմ, որ ժողովուրդն, ով այսօր ունի հոսանքի, գազի անջատման խնդիր, Միքայել Մինասյանը, Ռոբերտ Քոչարյանը և մյուսներն ամենաքիչն են իրեն հետաքրքրում: Այս մասին «Փաստինֆո»-ի հետ զրույցում ասաց հոգեբան Միհրդատ Մադաթյանը՝ անդրադառնալով վարչապետի խոսնակի հայտարարություններին, որում վերջինս նշել էր Գագիկ Խաչատրյանի և նրա որդիները մեղադրվում են մաֆիա ղեկավարելու մեջ, որ Միքայել Մինասյանը բաժնեմասեր ունի Ucom-ում և այլ ընկերություններում, ինչպես նաև՝ շոշափել էր ԱԱԾ նախկին տնօրեն Արթուր Վանեցյանի անունը ՝ փայատերերի փոփոխության համատեքստում:

«Ինքն այսօր ունի 30 հազար դրամի, 50 հազար դրամի կոմունալ մուծելու խնդիր, ընդ որում՝ շատերն ունեին նախկինից որոշակի պարտքեր, որոնք որ ամսեամիս կամաց-կամաց մարում էին ներքին պայմանավորվածություններով և այլն, այսօրվա դրությամբ անջատումների տակ են և իրենց երեխայի համար կաթ չունեն տաքացնելու: Իշխանությունը պետք է զբաղվի սրանով: Իշխանությունը չպետք է զբաղվի թելադրելով, թե ում կալանավորեն նորից ու ինչ նոր շոու կազմակերպեն»,- ասաց հոգեբանը եւ արձանագրեց, որ արդեն կա նախադեպ, երբ Քոչարյանի վրա դրվել են ածականներ՝ կոռուպցիոն, գողանալ, թալանել, որից ոչ մեկը չարդարացվեց և ոչ մի իշխանավոր այդ մարդուց ներողություն չխնդրեց՝ նման անպատասխանատու ածականներ դնելու համար:

«Կարճ ժամանակ առաջ Ռոբերտ Քոչարյանը մեղադրվում էր Սպայկա ընկերության փայատիրության, Քաջարանի պղնձամոլիբդենային գործարանի մեջ և այլն՝ նույնպիսի ամպագորգոռ բառերով, էլ չասեմ 4 մլրդ-ի մասին, որոնք մինչ այսօր փնտրում են՝ նույնիսկ իրենց սառնարաններում և չեն կարողանում գտնել: Այդ կոռուպցիոն բառը կարելի է բոլորի վրա դնել»,- ասաց հոգեբանը:

Նա համոզված է, որ այս քայլերն իշխանությունն անում է ժողովրդի ուշադրությունը շեղելու համար, նրա խոսքով, երկու տարի շարունակ իշխանությունը ժողովրդի ուշադրությունը շեղելուց բացի, ուրիշ բանով չի զբաղվել և երկիրը հասցրել է անդունդին:

«Այսօր էլ ինչ-որ նոր լեգենդներ է հորինում, օգտվելով իր լծակներից, հնարավորություններից, որպեսզի ժողովրդի ուշադրությունը շեղի բուն նյութից: Իսկ բուն նյութերը Հայաստանում այսօր այնքան շատ են, որ անձամբ ես՝ որպես քաղաքացի թքած ունեմ որևէ մեկի ունեցվածքի կամ կոռուպցիոն սխեմաների վրա, բայց շատ հետաքրքրում է Արցախի հողերը հանձնելու հարցը, որը շատ ավելի կարևոր է ինձ համար, ավելի առաջնային է ինձ համար ու, եթե կա մեկը, ով ավելի առաջնային համարում է Միքայել Մինասյանի ունեցվածքը, ուրեմն ինքն ազգի դավաճան է»,- նշեց Մադաթյանը:
Նրա խոսքով՝ այսօրվա լարված իրավիճակում այս շոուն այն ազդեցությունը չի ունենա և, ընդհանրապես, վերջին շրջանում կազմակերպված բոլոր շոուները՝ «պապիկ շոու» և այլն, այն ազդեցությունը չունեն ինչ երկու տարի առաջ, երբ Ռոբերտ Քոչարյան էին ձերբակալում, Գագիկ Խաչատրյան էին ձերբակալում և այլն:

«Բնականաբար ազդեցությունն արդեն առաջվանը չէ: Կլինեն իհարկե որոշակի մարդիկ, ովքեր կոգևորվեն դրանից՝ ինչ-որ ֆեյսբուքյան ֆեյքեր կամ անելիք չունեցող, ոչ մի նշանակություն չունեցող մարդիկ, բայց ինձ թվում է , որ դա չէ ժողովուրդը: Ժողովուրդն այսօրվա դրությամբ ինձ նման քաղաքացիներ են, ովքեր հարց են տալիս՝ Արցախը հանձնելու իրավունք ով ունի, ցույց տվեք մեկին, ես վիզը կտրեմ»,- ասաց Մադաթյանը:
Անդրադառնալով՝ վարչապետի՝ կոպեկ առ կոպեկ վերադարձնելու հայտարարություններին, Մադաթյանն ասաց, որ վարչապետին կտա մի հարց՝ երկու տարվա ընթացքում քանի կոպեկ է ինքը վերադարձրել բյուջե:

«Ես պահանջում եմ, որ վարչապետը վերադարձնի Ռոբերտ Քոչարյանի գողացած 4 մլրդ դոլարը: Ես պահանջում եմ: Նույնիսկ 10 տոկոսը վերադարձնելու դեպքում ես պատրաստ եմ հրապարակային ներողություն խնդրել Նիկոլ Փաշինյանից և իր կառավարությունից և անվճար ծառայել այդ կառավարության համար ևս 10 տարի: Եթե 10 տոկոսը ետ կվերադարձնի: Սա իր խոսքերն են, իր բերանից դուրս եկած, որ դեռևս 2008թ իր դատի ժամանակ էր դա ասում, որ 4 մլրդ դոլար գումար է գողացվել, ժողովրդից է գողացվել և այլն: Ես ուզում եմ, որ այդ 4 մլրդ դոլարի 10 տոկոսը Նիկոլ Փաշինյանը ետ վերադարձնի և ես խոստանում եմ հրապարակավ ներողություն խնդրել իրենից և 10 տարի անվճար աշխատել այսօրվա իշխանությունների համար»,- նշեց Մադաթյանը:

Աղբյուր` Փաստինֆո