Փաստ ինֆո

Վարչապետի խոսնակի հայտարարությունից հետո ՀՀ գլխավոր դատախազությունից հայտնում են, թե Կոռուպցիոն հանցագործությունների դեպքերի առթիվ քննվող քրեական գործով ձեռք են բերվել կազմակերպված հանցավորությանը բնորոշ դրսևորումների մասին առերևույթ փաստական տվյալներ:

Հիշեցնենք, որ «Գալաքսի» ընկերությունների խմբի համահիմնադիր և Ucom ընկերության տնօրենների խորհրդի նախագահ Գուրգեն Խաչատրյանը հայտարարություն էր տարածել՝ հայտնելով կառավարության մակարդակով շանտաժի մասին, մասնավորապես հայտնել էր, որ վերջին օրերին արդեն ուղիղ պահանջ է ներկայացվել Ucom-ն օտարելու, իսկ չհամաձայնվելու դեպքում հստակ հայտնել են, որ կարճ ժամկետում ինձ մեղադրելու են առանձնապես ծանր հանցագործության կատարման մեջ և կալանավորելու, որին հետևելու է նույնաբնույթ գործողությունների իրականցումը իր մերձավորնեի նկատմամբ: Այս սկանդալային հայտարարությանը հաջորդեց մեկ այլ սկանդալային հայտարարություն, բայց արդեն ՀՀ վարչապետի մամուլի խոսնակ Մանե Գևորգյանի կողմից: «ՀՀ կառավարության ունեցած տվյալներով Գագիկ Խաչատրյանը եւ նրա որդիները ղեկավարել են Հայաստանում երկար տարիներ գործած կոռուպցիոն, մաֆիոզ համակարգ, ինչի արդյունքում կուտակել են մի քանի հարյուր միլիոն դոլարի ապօրինի հարստություն: Վարչապետի դիրքորոշումն այն է, որ այդ թալանվածը պետք է մինչեւ վերջ վերադարձվի պետությանը»։

«Փաստինֆո»-ն դիմեց ՀՀ գլխավոր դատախազություն` պարզելու, թե արդյոք քրեական գործ քննվում է Խաչատրյանների կողմից «մաֆիոզ» համակարգ ստեղծելու վերաբերյալ: «Կոռուպցիոն հանցագործությունների դեպքերի առթիվ հարուցվել և ներկայումս քննվում է քրեական գործ՝ բազմադրվագ և ծավալուն փաստերի ներառմամբ, որով ձեռք են բերվել նաև կազմակերպված հանցավորությանը բնորոշ դրսևորումների մասին առերևույթ փաստական տվյալներ»-ասաց ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրամայանը:

Ըստ նրա` «Քրեական գործով քրեական հետապնդում է իրականացվում Գագիկ Խաչատրյանի, ինչպես նաև նրա հետ փոխկապակցված անձանց, նրա աշխատանքային գործընկերների նկատմամբ: «Այդ բազմադրվագ և ծավալուն գործով իրականացվում է ակտիվ քննություն, որով կպարզվեն և համապատասխան քրեաիրավական գնահատականներ կտրվեն բոլոր առերևույթ հանցավոր դրսևորումներին և հանգամանքներին»,- ասաց Աբրահամյանը:

Ի դեպ` ԱԱԾ-ի ավելի վաղ տարածած հաղորդագրության համաձայն` Գագիկ Խաչատրյանը մեղադրվում է 2008-2014թթ. պետական գործունեության ընթացքում թույլ տված ենթադրյալ պաշտոնեական դիրքի չարաշահման և գույքի վատնման մեջ: Հանցավոր համագործակցություն ստեղծելու, այն ղեկավարելու մեղադրանք մինչեւ վարչապետի խոսնակի կողմից հնչեցված հայտարարությունը առաջադրված չի եղել:

Մանե Գեւորգյանը նաեւ հայտարարել էր, թե վարչապետը դժգոհ է կոռուպցիոն գործերի քննության ընթացքից. «վարչապետը մի քանի անգամ այդ թվում հրապարակային դժգոհություն է արտահայտել, որ հայտնի կոռուպցիոներների առնչվող քրեական գործերը չունեն հանրության կողմից ակնկալվող արդյունավետություն: Վարչապետը՝ առայժմ համբերատար, Հայաստանի իրավապահ համակարգից սպասում է արագ եւ կոնկրետ արդյունքների»:
«Փաստինֆո»-ն հետաքրքրվեց, թե արդյոք քննարկվում է գլխավոր դատախազի հրաժարականի հարցը, ինչին ի պատասխան Աբրահամյանը նշեց, որ «այդտեղ մեկնաբանելու բան չկա»:

Ինչ վերաբերում է Գուրգեն Խաչատրյանի հայտարարությանը, որն, ըստ էության, վերաբերում էր առանձին պաշտոնյաների կողմից դիրքը չարաշահելու, բիզնեսը խլելու. Գույքն` ազատության դիմաց անօրինական գործարք առաջարկելու մասին` պարզվում է իրավապահներն ընթացք չեն տալիս: Գլխավոր դատախազի խորհրդականը նշեց, թե ակնկալում են, որ հայտարարության հեղինակն այդ տեղեկությունները կներկայացնի իրավապահ մարմիններին։

Աղբյուր` Փաստինֆո