Փաստ ինֆո

Հեղափոխությունից հետո միակ փոփոխությունը, որ տեղի ունեցավ, դա մարդկանց մեջ իշխանություն հասկացության տոտալ վարկաբեկումն էր և ընդհանրապես պետության հանդեպ հարգանքի, ինչ-որ տեղ անգամ վախի կամ ակնածանքի տոտալ ոչնչացումը: «Փաստինֆո»-ի հետ զրույցում այս մասին ասաց քաղաքագետ Հրանտ Մելիք-Շահնազարյանը անդրադառնալով հեղափոխությունից երկու տարի անց նկատվող փոփոխություններին:

Քաղաքագետի խոսքով հանրության շրջանում նկատվում է պետական հասկացության և գաղափարի բավական լուրջ թուլացում. «Ատելության մթնոլորտը և մնացած թերությունները, որին ականատես ենք լինում, բխում են հենց այդ գաղափարից, որ ժողովուրդը սկսել է չհարգել, չսիրել և չընկալել ո'չ պետական իշխանությանը, ո'չ էլ պետությունը: Այդ ամենը սկսվեց այն պահից, երբ Նիկոլ Փաշինյանը հայտարարեց, որ Գյումրիից քայլարշավ է սկսում դեպի Երևան իշխանափոխություն անելու նպատակով, և ամբողջ այդ ճանապարհին նա հենց դա էր քարոզում. անարգանք պետական պաշտոնյայի, պետական կառույցների, պետության նկատմամբ, թշանամանք այլ կերպ մտածող մարդկանց նկատմամբ»,-ասաց Հրանտ Մելիք-Շահնազարյանը:

Վերջինս նկատեց վերջին երկու տարիների ընթացքում մեր հարաբերությունները վատացել են ոչ միայն Ռուսաստանի հետ, այլև մյուս երկրների հետ դրանք իսպառ վերացել են. «Նիկոլ Փաշինյանն արդեն երկու տարի է ղեկավարում է երկիրը և մեկ անգամ չի կարողացել ինչ-որ բարձրաստիճան պաշտոնյայի հետ աշխատանքային հանդիպում ունենա: Խոսքս տարբեր միջազգային կազմակերպությունների միջանցքներում մեկ-երկու վայրկյան տեսնելու մասին չէ, այլ երկկողմ հարաբերությունների վերաբերող խնդիրների մասին: Նույնը կարող եմ ասել նաև Ռուսաստանի հետ հարաբերությունների մասին: ՌԴ նախագահի վերջին այցի ժամանակ տեսանք, որ քննարկումներն ամբողջությամբ վերաբերում էին Եվրասիական միության տարածքում ինտեգրացիոն գործընթացներին կամ ՀԱՊԿ կամ ԵԱՏՄ և այլն, բայց հայ-ռուսական հարաբերությունների մասին որևէ բան չէր խոսվում»,-ասաց Հրանտ Մելիք-Շահնազարյանը ընդգծելով, որ վերջին այս հայտարարություններն ապացուցեցին, որ Հայաստանը Ռուսաստանի հետ երբեք չի ունեցել նման ցածր մակարդակի հարաբերություններ, որքան դա այսօր է:
Քաղաքագետը վստահ է, որ Նիկոլ Փաշինյանը և նրա քաղաքական թիմը երեք տարի իշխելու ռեսուրս չունեն: Հրանտ Մելիք-Շահնազարյանը նշեց, որ իշխանություններն իրենց հասարակական ընկալումների և քաղաքական աճի գագաթնակետն արդեն հաղթահարել են, ինչը հունվարից սկսած հստակ երևում է. «Կարծում եմ` այս իշխանությունն արդեն գնում է դեպի անկում: Թե որքան ժամանակ պետք կգա և ինչ խոչընդոտներ կառաջանան, դժվար է կանխատեսել, բայց այն, որ երեք տարվա ռեսուրս չունի, փաստ է և անիմաստ է խոսել ընտրությունների ժամանակ մեծ ձայներ հավաքելու մասին»,-ամփոփեց քաղաքագետը:

Հեղինակ՝ Հասմիկ Կոշկարյան

Աղբյուր` Փաստինֆո