Փաստ ինֆո

ԱԺ փոխնախագահ Ալեն Սիմոնյանի կողմից ծեծի ենթարկված հասարակական գործիչ, «Ադեկվադ» միաբանության համահիմնադիր Արթուր Դանիելյանին տեղափոխել են Էրեբունի ԲԿ: Այս մասին հայտնել է միաբանության համահիմնադիր Կոնստանտին Տեր-Նակալյանը՝ նշելով, որ Կենտրոնի ոստիկանությունում որոշել են, որ վիրահատական միջամտության անհրաժեշտություն կա:

Ավելի վաղ տեղեկացրել ենք, որ այսօր ԱԺ փոխնախագահը փողոցում հանդիպելով Արթուր Դանիելյանին ծեծել է նրան։ Դեպքի ժամանակ, ըստ Տեր-Նակալյանի, Ալեն Սիմոնյանի հետ գտնվել է նաեւ ՊՈԱԿ-ի Հովոն։

«Մտավախություն ունենք, որ ուզում են ծածկադմփոց անելով, Արթուրին մեկուսացնելով ձերբակության որոշում կայացնեն»: Այս մասին ուղիղ եթերում ասել էր «Ադեկվադ» միաբանության համահիմնադիր Կոնստանտին Տեր-Նակալյանը:

Ոստիկանները թույլ չեն տվել մտնել հիվանդանոց: Տեր-Նակալյանը հայտնեց, որ Արթուր Դանիելյանը փողոցում պատահաբար հանդիպել էԱլեն Սիմոնյանին, ով միայնակ չի եղել, նրա հետ առնվազն եղել է ՊՈԱԿ-ի Հովոն:

«Ալեն Սիմոնյանը բարևել է, Արթուրը պատասխանել է, ինչից հետո Ալեն Սիմոնյանը հարվածել է Արթուրին: Արթուրը եղել է միայնակ»,- ասաց նա՝ հավելելով, որ Արթուր Դանիելյանի հետագա գործողությունները եղել են՝ ինքնապաշտպանությունից դրդված:

Տվյալ մանրամասներից հետո Տեր-Նակալայնը մեկ այլ ուղիղ եթերում ասել էր, որ Արթուր Դանիելյանին թույլ չեն տվել բուժօգնություն ստանալ և հիվանդանոց մտնելուց ձերբակալել են վերջինիս:

Տեր-Նակալյանը նշեց, որ Ալեն Սիմոնյանը հարցազրույցներ է տվել, որով, ըստ էության, հաստատվել է, որ առաջինն ինքն է հարվածել Դանիելյանին: «Ալեն Սիմոնյանի ասելով ինքը հարվածել է, որովհետև իրենց հայհոյել են, բայց մենք տեսանք, որ Ալեն Սիմոնյանի մտքին չէր, երբ երեկ իրեն անբարոյականի վաստակ էին ասում »,- ասաց նա՝ հավելելով, որ այս պատմությունը նրանք չեն մարսելու:

Ավելի վաղ Կոնստանտին Տեր-Նակալյանը «Ֆեյսբուք»-ի իր էջում տեղադրել է «Ադեկվադ» նախաձեռնության համահիմնադիր Արթուր Դանիելյանի լուսանկարը, որտեղ երևում է Դանիելյանի վնասված և արյունոտված քիթը։

«Ալեն Սիմոնյանը հարձակվել է փողոցում զբոսնող Արթուր Դանիելյանի վրա»,- գրել է Տեր-Նակալյանը։

Ազգային ժողովի պատգամավոր Արման Բաբաջանյանը «Ֆեյսբուք»-ի իր էջում գրել է, որ հարձակման է ենթարկվել ԱԺ փոխնախագահ Ալեն Սիմոնյանը։

«Մեզ բոլորիս պետք է սթափվել, այսպես շարունակել չի կարելի։ Ալենի հետ հեռախոսազրույց եմ ունեցել։ Պատահարի մասին հայտնել եմ ոստիկանապետ Արման Սարգսյանին»,- գրել է Բաբաջանյանը։

Ալեն Սիմոնյանը հայտնել է, որ զբոսնելիս տեսել է «Ադեկվադ» շարժման մի քանի ակտիվիստի, որոնցից մեկը հայհոյանք է հնչեցրել, ինչից հետո սկսվել է ծեծկռտուք։

Աղբյուր` Փաստինֆո