Փաստ ինֆո

Ալեն Սիմոնյանն իր տված հարցազրույցում, ըստ էության, հաստաստեց, որ ինքն է սկսել ծեծկռտուքը և այս պարագայում հասկանալի չէ, թե ինչու է Արթուր Դանիելյանը բերման ենթարկվածի կարգավիճակում գտնվում: Այս մասին այսօր լրագրողների հետ ճեպազրույցում ասաց «Ադեկվադ» միաբանության անդամ Կոնստանտին Տեր-Նակալյանը:

Նա հայտնեց, որ միջադեպը տեղի է ունեցել Արամի փողոցում: Ավելի վաղ Կոնստանտին Տեր-Նակալյանը «Ֆեյսբուք»-ի իր էջում տեղադրել է «Ադեկվադ» նախաձեռնության համահիմնադիր Արթուր Դանիելյանի լուսանկարը, որտեղ երևում է Դանիելյանի վնասված և արյունոտված քիթը։

«Ալեն Սիմոնյանը հարձակվել է փողոցում զբոսնող Արթուր Դանիելյանի վրա»,- գրել է Տեր-Նակալյանը։

Ազգային ժողովի պատգամավոր Արման Բաբաջանյանը «Ֆեյսբուք»-ի իր էջում գրել է, որ հարձակման է ենթարկվել ԱԺ փոխնախագահ Ալեն Սիմոնյանը։

«Մեզ բոլորիս պետք է սթափվել, այսպես շարունակել չի կարելի։ Ալենի հետ հեռախոսազրույց եմ ունեցել։ Պատահարի մասին հայտնել եմ ոստիկանապետ Արման Սարգսյանին»,- գրել է Բաբաջանյանը։

Ալեն Սիմոնյանը հայտնել է, որ զբոսնելիս տեսել է «Ադեկվադ» շարժման մի քանի ակտիվիստի, որոնցից մեկը հայհոյանք է հնչեցրել, ինչից հետո սկսվել է ծեծկռտուք։

Նակալյանի խոսքով, Արթուր Դանիելյանն Ալեն Սիմոնյանի հասցեին ոչ մի սեռական հայհոյանք չի հնչեցրել. «Եթե Ալեն Սիմոնյանն այն տղան է, որ իր հասցեին հնչած վիրավորանքների ժամանակ բռունցքներին է դիմում, ուզում եմ հասկանալ՝ ինչու երեկ բռունցքներին չդիմեց Էդմոն Մարուքյանի նկատմամբ, ով իրեն անվանեց «Անբարոյականի վաստակ»»:

Նա շեշտեց, որ Արթուր Դանիելյանն իր հնարավորությունների սահմաններում փորձել է ինքնապաշտպանվել՝ իր վրա խուլիգանաբար հարձակված ԱԺ փոխխոսնակից:

«Վստահ ենք, որ այս ամենից փորձելու են գործ կարել, քանի որ իշխանական ֆեյքերն արդեն այդ ալիքն են տանում, որ ԱԺ փոխխոսնակը հարձակման ենթարկվեց սևազգեստ մարդկանց կողմից, սակայն պատկերը, այդ թվում Ալեն Սիմոնյանի նկարագրածով հակառակն է»,-ասաց Տեր-Նակալյանը:

Աղբյուր` Փաստինֆո