Փաստ ինֆո

Գեղարքունիքի մարզի Վարդենիս համայնքում վերջին երեք օրերի ընթացքում կորոնավիրուսի նոր դեպք չի գրանցվել: 

«Փաստինֆո»-ի հետ զրույցում համայնքի ղեկավար Արամ Մելքոնյանն ասաց, որ գրանցված դեպքերը մեկուսացվածների շրջանակում են եղել և համայնքում վարակի նոր աղբյուր ու նոր դեպք չկա. «Փառք Աստծո այս պահին ամեն ինչ լավ է, քաղաքում ոչ մի ջերմող չկա: Ուշադիր հետևում ենք և մարդիկ էլ հիմա լրջացել են, հետևում են պարետի բոլոր ցուցումներին»,-ասաց Արամ Մելքոնյանը:

Նրա խոսքով այս օրերին համայնքի բնակիչները շարունակում են զբաղվել գյուղատնտեսական և անասնապահական աշխատանքներով: Վարդենիսում ի տարբերություն մարզի մյուս քաղաքների արտագնա աշխատանքի մեկնողները քիչ են. «Գյուղատնտեսությունն այստեղ զարգացած է, հատկապես կարտոֆիլի, ցորենի մշակումը: Ֆերմերային տնտեսություններն այստեղ նույնպես շատ են, դրա համար էլ մեզ մոտ համեմատաբար քիչ են արտագնա աշխատանքի մեկնողները: Այս ընթացքում մարդիկ ակտիվ զբաղվում են գյուղատնտեսությամբ և այն մի մետր չմշակած հողն էլ արդեն մշակում են»,-ասաց համայնքապետը:

Անդրադառնալով ընտանիքների սոցիալական վիճակին Արամ Մելքոնյանն ասաց, որ սոցիալական խնդիրների հետ կապված համայնքապետարան չեն դիմել, սակայն տարբեր կազմակերպություններից օգնություն ստանում են համայնքի բնակիչները. «Մի քանի օրից արդեն երկրորդ անգամ «Գեոպրոմայնինգ» ընկերությունը 795 ընտանիքի սնունդով կօգնի: Շատ քաղաքացիներ, ովքեր գյուղատնտեսությամբ են զբաղվում, կարտոֆիլ, կաղամբ 1.5 կամ 2 տոննայով ուղարկում են, որոնք ևս համայնքապետարանը բաշխում է ընտանիքների միջև»,-ասաց Արամ Մելքոնյանը:

Ինչ վերաբերում է կոմունալ վճարումներին, համայնքապետի խոսքով այդ հարցով նույնպես դիմող չի եղել. «Դիմողներ չեն եղել, որ չեն կարողանում վճարել: Ավելի շատ եղել են մարդիկ, ովքեր օգտվել են կառավարության կոմունալ վճարումների փոխհատուցման ծրագրերից»,-նշեց Արամ Մելքոնյանը:

Աղբյուր` Փաստինֆո