Փաստ ինֆո

Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի կողմից իրականացվել են ուսումնասիրություններ 2020 թվականի մարտ-ապրիլ ամիսների ընթացքում գնային փոփոխություններ արձանագրած ադամաթուզ ապրանքային շուկայում գերիշխող դիրք ունեցող ընկերությունների գործունեության՝ մասնավորապես գնային քաղաքականության հիմնավորվածությունը պարզելու նպատակով: Այս մասին հայտնում են Արցախի Տեղեկատվական շտաբից:

Հաշվի առնելով, որ ուսումնասիրվող ապրանքատեսակը ներմուծվում է` ուսումնասիրությունը իրականացվել է ձեռքբերման և իրացման գների դինամիկաների, ինչպես նաև ՀՀ-ում տվյալ ժամանակահատվածում գործող գների համադրության համատեքստում:

Ուսումնասիրվող ժամանակահատվածում գերիշխող դիրք ունեցող ընկերության իրացման գինը նվազել, ապա աճել է (նույն դինամիկան եղել է ՀՀ շուկայում), որի արդյունքում 1կգ ադամաթուզի համար 26 դրամով կամ 5.7 տոկոսային կետով նվազել է ձեռքբերման և իրացման գնի տարբերությունը՝ մարժան:

Գրաֆիկից պարզվում է նաև, որ ձերքբերման և իրացման գների դինամիկաների փոփոխությունը որոշ հատվածներում անհամաչափ է եղել՝ ի վնաս ընկերությանը, քանի որ ձերքբերման գնի աճի պարագայում ընկերությունը միանգամից և համաչափ չի բարձրացրել իրացման գինը:

Նշվածը փաստում է, որ «Ադամաթուզ» ապրանքային շուկան մրցակցային է և շուկայում գերիշխող դիրք ունեցող 2 ընկերությունները իրար հետ մրցակցելուց բացի, մրցակցում են նաև միրգ բանջարեղեն ներմուծող սուբյեկտների հետ:

Ուսումնասիրության արդյունքները ցույց են տվել, որ Արցախի Հանրապետությունում ադամաթուզի իրացման գների փոփոխությունները եղել է հիմնավորված և «Տնտեսական մրցակցության պաշտպանության մասին» ԼՂՀ օրենքի խախտման՝ մասնավորապես գերիշխող դիրքի չարաշահման երևույթներ չեն բացահայտվել:
Ներկայումս Արցախի Հանրապետությունում ադամաթուզի իրացման միջին գինը նորից նվազել է և ապրիլի 27-ի դրությամբ կազմում է 667 դրամ 1կգ համար:

Աղբյուր` Փաստինֆո