Փաստ ինֆո

Ըստ այս օրենսդրության՝ Կառավարությունը պարտավոր է բյուջեի ներսում համապատասխան տոկոսից դուրս արված շարժերի համար գալ խորհրդարան՝ թույլտվություն ստանալ: Հիմա փաթեթ է բերվել խորհրդարան, որ մինչև տարեվերջ, որքան շարժ անեն, այլևս չեն գալու ԱԺ, խորհրդարանը սրա հետ համաձա՞յն է, թե՞ ոչ, սրա մասին է փաթեթը, խորհրդարանը թու՞յլ է տալիս, որ Կառավարությունը բյուջեի փաթեթի մեջ որքան ուզի, ոնց ուզի շարժեր անի: Այս մասին այսօր Ազգային ժողովում ասաց «Լուսավոր Հայաստան» խմբակցության ղեկավար Էդմոն Մարուքյանը՝ դիմելով ՀՀ ֆինանսների նախարար Ատոմ Ջանջուղազյանին։ 

Ինչպես արդեն տեղեկացրել ենք՝ կառավարությունն առաջարկում է փոփոխություն կատարել «ՀՀ 2020թ. պետական բյուջեի մասին» օրենքում՝ նշելով, որ հաշվի առնելով ներքին և արտաքին շոկերի առկայությունը, նախատեսվում է ունենալ 2 տոկոս անկում, ինչպես նաև համավարակի տնտեսական ազդեցությունը մեղմելու համար նախատեսվում է ներգրավել մոտ 260 մլրդ դրամ լրացուցիչ պարտքային միջոցներ:

Մարուքյանը հետաքրքրվեց նաև, թե կառավարությունը ՀՆԱ-ի քանի տոկոսի չափով է պատրաստ անվերադարձ կատարել ծախսեր՝ ժողովրդի սոցիալ-տնտեսական և տնտեսավարողների վիճակը բարելավելու իմաստով:

Ֆինանսների նախարար Ատոմ Ջանջուղազյանը արձագանքելով ասաց, որ բոլոր ջանքերը ներդնում են, որ աջակցությունը լինի հասցեական. «Ձևակերպումը, թե Կառավարությունը քանի տոկոսի չափով է պատրաստ անվերադարձ ծախսեր կատարել՝ իր պարզ պատասխանն ունի: Մեր հնարավորություններով է պայմանավորված այդ տոկոսը, ոչ թե պետք է տոկոս դրվի և դրան սկսենք մոտենալ, այլ պետք է գնահատենք, թե ինչի կարիքն ունենք ու մեր ունեցած կարիքն ինչ միջոցառումների շրջանակում պետք է բավարարենք»:

Էդմոն Մարուքյանը, գնահատելով կառավարության աջակցության ծրագրերի հասցեականությունը, ասաց, որ ձևավորված չափորոշիչները նման են դեզի մեջ ասեղ փնտրելուն, այսինքն՝ գրեթե անհնար է գտնել: «Այդ պրոցեդուրայի պատճառով հազարավոր կարիքավոր ընտանիքներ դուրս են մնացել Ձեր կառավարության 14 ծրագրերից: Իսկ նախագծի հետ կապված, Դուք ուզում եք, որ ամբողջ տարին բյուջեի փոփոխությունների համար չգաք խորհրդարան և գաք միայն դեֆիցիտի պարագայում: Ի՞նչն է խնդիրը, Կառավարությունը երբ արտահերթ նիստ է հրավիրում խորհրդարանը հավաքվում է, բա խորհրդարանի պատգամավորները կարծիք չասե՞ն բյուջեի ծախսերի վերաբերյալ»,-հարցրեց ԼՀԿ ղեկավարը:

Ջանջուղազյանն էլ պատասխանեց, որ Կառավարությունն այսպես թե այնպես ամեն օր Կառավարության հերթական կամ արտահերթ նիստում իրականացնում է այն գործառույթը, որի համար կոչված է ու վերաբաշխումներ է կատարում բյուջեի կատարման ընթացքը կազմակերպելու համար:

«Այստեղ խնդիրն այս ժամանակահատվածի մասին է, ոչ թե առհասարակ: Ոչ ոք չգիտի, թե երբ է ավարտվելու այս ամենը ու երբ է աշխարհը վերադառնալու իր բնականոն հունին, հետևաբար դրա անհրաժեշտությունն ինչ պարբերականությամբ կառաջանա և կառավարությունը՞ պետք է այդ որոշումները կայացնի, թե՞ ԱԺ-ն։ Մենք կարծում ենք, որ այս կարճաժամկետ հատվածի համար ամբողջությամբ կիրառելի է այն նախագիծը, որն առաջարկում ենք: Այսինքն` բյուջեում յուրաքանչյուր վերաբաշխման համար նախագիծը եթե ԱԺ-ում պետք է քննարկվի, դա նշանակում է, որ մինչև այժմ նույնիսկ բնականոն վիճակի համար սահմանված կարգավորումները արդարացված չէին»,-ասաց Ֆինանսների նախարարը:

Աղբյուր` Փաստինֆո