Փաստ ինֆո

ՀՀ վարչապետի մամուլի խոսնակ Մանե Գևորգյանի Գագիկ Խաչատրյանին և նրա ընտանիքին վերաբերող գրառման մեջ առկա է իրավական խնդիր՝ խախտվում է Գագիկ Խաչատրյանի և նրա որդիների անմեղության կանխավարկածը: «Փաստինֆո»-ի հետ զրույցում ասաց փաստաբան Երեմ Սարգսյանը։

Հիշեցնենք, որ «Գալաքսի» ընկերությունների խմբի համահիմնադիր, Ucom ընկերության տնօրենների խորհրդի նախագահ Գուրգեն Խաչատրյանն այսօր հայտարարել է, որ վերջին օրերին ուղիղ պահանջ է ներկայացվել Ucom-ն օտարելու, իսկ չհամաձայնվելու դեպքում հստակ հայտնել են, որ կարճ ժամկետում իրեն մեղադրելու են առանձնապես ծանր հանցագործության կատարման մեջ և կալանավորելու, որին հետևելու է նույնաբնույթ գործողությունների իրականցումը եղբորս, ընտանիքի այլ անդամների, ազգականներիս, մտերիմնեիս, ինչպես նաև մեզ հետ առնչվող այլ անձանց նկատմամբ։

«Հատվել են իրավական ու բարոյական սահմաններ, ինչն ամբողջությամբ արձանագրված է ու ինչը դեռ կներկայացնենք։ Կոչ ենք անում ՀՀ-ում դիվանագիտական առաքելություն իրականացնող դեսպաններին, ՀՀ-ում գործող տեղական և միջազգային բիզնես ասոցացիաներին, ՀՀ մարդու իրավունքների պաշտպանին և իրավապաշտպան կազմակերպություններին հետևել այս գործընթացին և գնահատականներ տալ։ Պահանջում ենք անհապաղ դադարեցնել ապօրինությունները և տեղեկացնում, որ ճնշումների, սադրանքների, պետական որոշ լծակների ոչ իրավաչափ կիրառման միջոցով իրականացվող ճնշումներին տեղի չենք տալու»,- հայտարարել է Գուրգեն Խաչատրյանին, որին հաջորդեց ՀՀ վարչապետի խոսնակ Մանե Գեւորգյանի հայտարարությունն առ այն, թե «ՀՀ կառավարության ունեցած տվյալներով Գագիկ Խաչատրյանը եւ նրա որդիները ղեկավարել են Հայաստանում երկար տարիներ գործած կոռուպցիոն, մաֆիոզ համակարգ, ինչի արդյունքում կուտակել են մի քանի հարյուր միլիոն դոլարի ապօրինի հարստություն: Վարչապետի դիրքորոշումն այն է, որ այդ թալանվածը պետք է մինչեւ վերջ վերադարձվի պետությանը»։

Խաչատրյանների փաստաբանն արձանագրեց, որ Մանե Գևորգյանըն, ըստ էության, խոսում է վարչապետի, կառավարության անունից։ «Մենք հստակ պետք է տարանջատենք այն դեպքերը, երբ ինչ-որ մարդիկ ինչ-որ մասնավոր զրույցներում խոսակցություններ են ունենում, իրենց ենթադրությունները կամ որոշակի տեղեկությունները վերլուծելով ինչ-որ հետևությունների են հանգում և հստակ պետք է տարանջատենք, երբ պետական բարձր մակարդակով նման տեքստեր են ձևակերպվում, որ մաֆիոզ համակարգ են ղեկավարում, կոռուպցիոն համակարգ են ղեկավարում, այն դեպքում, երբ որևէ նման մեղադրանքի հարց էլ չկա: Այսինքն` որևէ տեղ չտեսանք այդ մաֆիոզ համակարգի կառավարումը և այսօր նման ինչ-որ մեղադրանք է, որը որ ձևավորված արդեն կարծեք թե հաստատուն համոզմունք է ձևավորում յուրաքանչյուրի մոտ: Եթե ես այս իրավիճակին ավելի խորը ծանոթ չլինեի, ապա ինձ մոտ տպավորություն է առաջանում, որ միանշանակ հաստատված փաստեր են, որովհետև տեսեք ինչ մակարդակով է սրա մասին խոսվում այն դեպքում, երբ նույնիսկ մեղադրանք չկա»,-ասաց Երեմ Սարգսյանը:

Վերջինս նշեց, որ այս հայտարարությունից հետո սպասում են, որ կլինեն որոշակի գործողություններ. «Պատկերացրենք այն պաշտոնատար անձանց, որոնք պետք է այս հարցով առնչվեն, հանկարծ պետք է ասեն, որ չհաստատվե՞ց: Որևէ պաշտոնատար անձ, որևէ դատավոր, այս հայտարարությունից հետո, հասարակական այս ճնշման մթնոլորտում պետք է հանկարծ իր որոշման մեջ արձանագրի, որ այն, ինչ ասում էր վարչապետի խոսնակը չհաստատվե՞ց: Սրանից հետո էլ ինչպես է լինում ճնշումը, անմեղության կանխավարկածի խախտումը: Այսինքն ասվեց մի բան, որն ամեն գնով պետք է իրականություն դառնա»,-ասաց փաստաբանը՝ նկատելով, որ որոշ պաշտոնատար անձինք այնպիսի հարցերի են արձագանքում և այնպիսի ձևակերպումներով, որ փաստաբանի պնդմամբ իրենց լիազորություններից դուրս է։

«Նույնիսկ մեզ որևէ մեկը քրեական գործով չի ասել, բայց իրավական քննության հետ որևէ առնչություն չունեցող անձը խոսում է կոնկրետ քրեական գործի ինչ-որ հանգամանքների մասին՝ մաֆիոզի պիտակ կպցնելով, կոռուպցիոն մեխանիզմներ կառավարողի պիտակ կպցնելով: Հիմա արդեն ինձ մոտ տպավորություն է, որ անմիջապես կհետևեն կոնկրետ գործողություններ և ամեն ձևով կփորձեն արդեն պաշտոնական մակարդակով այս խոսքերը հաստատել, որովհետև եթե չհաստատվեց, հարց է ծագելու, թե այս ինչի մասին էր խոսում վարչապետի մամուլի խոսնակը»,-նշեց Երեմ Սարգսյանը։
Փաստաբանը նաև չի բացառեց, որ հայտարարության մեջ կան զրպարտության հատկանիշներ և արդեն պատկերացնում է, թե պաշտոնատար անձանց մակարդակում սա ինչ ահազանգեր է լինելու:

«Փորձը ցույց է տվել, որ ինչ-որ մակարդակում հայտարարություն է արվում և դրան հետևում են կոնկրետ գործողություններ: Մի քանի քայլ ավելի շուտ գիտեինք արդեն, թե ինչ կարող է կատարվել, բայց երբևէ չէի կարող պատկերացնել, որ նման ձևակերպումներ կլինեն: Թե որտեղից այս մասին գիտեինք, Գուրգեն Խաչատրյանն արդեն իր հայտարարության մեջ նշել է: Բայց հայտարարության տեքստում հերքում չտեսա: Տարբեր մակարդակի պաշտոնատար անձինք, ովքեր կառնչվեն այս հարցի հետ, ինչպես պետք է իրենք իրենց մեջ ուժ գտնեն, որ նույնիսկ փաստեր լինելու դեպքում ասեն, որ չհաստատվեց սա: Ես անկեղծ չեմ հավատում, որովհետև տեսնում եմ, թե մեկ փոքրիկ հայտարարությունն ինչ հստակ նշանակություն է ունենում կոնկրետ պետական պաշտոնյաների վրա հայտարարությանը իրենց գործելաոճը համապատասխանեցնելու առումով»,-հավելեց Երեմ Սարգսյանը՝ ընդգծելով, որ կքննարկի գործընկերների հետ և կձևավորեն իրենց դիրքորոշումն այս հարցի շուրջ հետագա քայլերի համար:

Հեղինակ՝ Հասմիկ Կոշկարյան

Աղբյուր` Փաստինֆո