Փաստ ինֆո

Ազգային ժողովը քննարկում է Արտակարգ դրության իրավական ռեժիմի մասին» օրենքում փոփոխություններ եւ լրացումներ կատարելու մասին և «Նորմատիվ իրավական ակտերի մասին» օրենքում լրացում կատարելու մասին օրենքների նախագծերի փաթեթն առաջին ընթերցմամբ ընդունելու մասին հարցը:

Արդարադատության նախարարի տեղակալ Ռաֆիկ Գրիգորյանն ասաց, որ պետական կառավարման համակարգի և կառավարչական իրավահարաբերությունների, ինչպես նաև իրավական որոշակիության սկզբունքի համատեքստում առաջարկվում է հստակեցնել պարետի և պարետատան դերը, կարգավիճակը, պարետի կողմից ընդունվող ակտերի բնույթը:

«Սահմանվել է, որ արտակարգ դրություն սահմանված լինելու դեպքում վարչապետը կամ փոխվարչապետը կարող է հանդես գալ որպես պարետ, ով իրականացնում է արտակարգ դրության իրավական ռեժիմն ապահովող ուժերի ու միջոցների միասնական ղեկավարումը, համակարգումը, կիրառվող միջոցառումների իրականացումը, ինչպես նաև միջոցառումներին կարող է ներգրավել նաև այլ պետական մարմիններին»,-ասաց նախարարի տեղակալը:

Նա շեշտեց՝ նախագծով սահմանվում է, որ իր լիազորությունների ընթացքում պարետը կարող է ընդունել ակտեր՝ որպես համապատասխանաբար վարչապետի կամ փոխվարչապետի կողմից ընդունված ակտ, այդ թվում նաև ենթաօրենսդրական նորմատիվ ակտեր:

«Նախագծի տեքստում Կառավարության որոշմամբ նախատեսված լինելու դեպքում պարետը ստեղծում է պարետատուն ՝ որպես իր խորհրդակցական մարմին, սակայն Պետաիրավական հանձնաժողովի անդամների առաջարկների հիման վրա որոշել ենք ֆիքսել, որ կառավարության որոշմամբ պետք է պարետատունը ստեղծվի, իսկ պարետը կարող է անհրաժեշտության դեպքում սահմանել դրա գործունեության կարգը»,-ասաց Գրիգորյանը:

Նախարարի տեղակալը հայտնեց, որ մի շարք դեպքերում իրավիճակին արդյունավետ ու օպերատիվ արձագանքելու անհրաժեշտությունից ելնելով գործող սահմանափակումների ներքո հստակեցվել են որոշ միջոցառումներ, օրինակ՝ ուսումնական գործընթացի կազմակերպման և իրականացման սահմանափակումները, տրանսպորտային միջոցներով տեղափոխվող ուղևորների քանակի նորմավորումը և այլն:

«Սահմանվել է, որ անձնական ազատության իրավունքը կարող է սահմանափակվել արտակարգ դրության պայմաններում կիրառվող միջոցառումների իրականացման համար ներգրավված մարմինների կողմից տրված գրավոր կամ բանավոր կարգադրությամբ»,-ասաց Ռաֆիկ Գրիգորյանն ու շեշտեց, որ

«Վարչարարության հիմունքների և վարչական վարույթի մասին» օրենքն այս առումով երաշխիք է սահմանում , որ բանավոր վարչական ակտը հասցեատիրոջ բանավոր կամ գրավոր պահանջով ենթակա է գրավոր ձևակերպման:

Նա նաև հայտնեց, որ անձի ազատությունը կսահմանափակվի գրավոր կարգադրության հիման վրա, իսկ եթե հանգամանքներից ելնելով հնարավոր չէ ապահովել տվյալ պահին գրավոր ձևակերպում, ապա բանավոր կարգադրություն կլինի՝ պայմանով, որ սեղմ ժամկետում գրավոր կարգադրությունը կլինի:

Աղբյուր` Փաստինֆո