Փաստ ինֆո

ՀՀ վարչապետ Նիկոլ Փաշինյանն այսօր հայտարարել է, որ կոմունալների վարձավճարները չվճարելու դեպքում կասկածի տակ կլինի ամբողջ հանրապետությունում էլկետրաէներգիայի մատակարարման հարցը։ 

Ըստ նրա՝ կորոնավիրուսի հետևանքով առաջացած ճգնաժամային իրավիճակը, սոցիալական խնդիրը նկատի ունենալով կառավարությունը հայտարարեց, որ արտակարգ դրության ընթացքում կոմունալ վարձերը չվճարելու համար անջատումներ չեն լինելու, սակայն այդ ընթացքում հույս ունեին, որ ապրիլի 16-ին արտակարգ դրությունը կավարտվի:

Բայց արտակարգ դրությունը շարունակվեց, իսկ այս հայտարարության արդյունքում ոչ միայն սկսեցին կոմունալները չվճարել սոցիալապես անապահով անձինք, այլև նրանք, ովքեր հնարավորություն ունեն:

«Երբ մենք 10 օր առաջ նայում էինք, թե ովքեր չեն վճարել, հիմա տեսնում ենք, որ նաև հարուստ մարդիկ են սկսել չվճարել ու այդ չվճարման պատճառն այն է, որ կառավարությունն ասել է՝ չվճարելու դեպքում անջատումներ չեն լինելու: Այստեղ առաջանում է հետևյալ խնդիրը՝ փաստորեն բաժանորդները համատարած չեն վճարում ցանցերին, ցանցերն էլ արտադրողներին, արտադրողները չեն կարողանում վճարել իրենց մատակարարներին և աշխատողներին, չեն վճարում հարկեր և համակարգը կարող է քանդվել»,-ասաց վարչապետը:

Փաշինյանը շեշտեց, որ ընտրությունը ոչ թե նրանում է, թե 1000-5000 հոգու հոսանքը պետք է անջատել, թե ոչ, այլ հարցն այն է, թե երկրում հոսանք ընդհանրապես լինելո՞ւ է, թե՞ ոչ:

«Հանրային ծառայության հանձնաժողովը մեր առաջ հարց էր դնում, ասում էր, որ եթե այսպես գնանք ոչ թե մեր ընտրությունը լինելու է առանձին մարդկանց գազը կամ հոսանքն անջատելը, այլ երկրում հոսանք կամ գազ կա թե ոչ: Այս պայմաններում մենք համաձայնություն տվեցինք, որ հանրային ծառայության հանձնաժողովն ու մատակարար ընկերությունները որոշակիորեն կոշտացնեն իրենց դիրքորոշումը»,-ասաց ՀՀ վարչապետը:

Նա տեղեկացրեց, որ ՀՀ-ում կա 775 հազար էլեկտրական էներգիայի բաժանորդ և 623 հազար գազի բաժանորդ, և այս պահին անջատվել է 4300 բաժանորդների հոսանք և 736 գազի բաժանորդների գազի մատակարարում: «պետք է տեղորոշել այն մարդկանց, ովքեր իրոք աջակցության կարիք ունեն»,- ասաց Փաշինյանը:

Աղբյուր` Փաստինֆո