Փաստ ինֆո

ԱԺ «Բարգավաճ Հայաստան» խմբակցության քարտուղար Արման Աբովյանն այսօր անդրադարձել է ԱԺ փոխնախագահ Լենա Նազարյանի դիտարկմանը, թե «Արարատ ցեմենտ» ընկերությունը հրաժարվել է միանգամից 8 աշխատակցի ժամանակավոր պայմանագրեր երկարացնել՝ շատ լավ իմանալով, որ նման պայմաններում մարդիկ չեն կարող բողոքել:

«Իհարկե, սեփական բիզնեսի շահերը պաշտպանող խմբակցությունն ասաց, որ քաղաքական ենթատեքստ չկա, իրավական հարցեր են, բայց, երբ մոտենում ենք մարդկանց՝ սովելուց եք խոսում, գուցե ջանք գործադրեք, որ այդ մարդիկ առանց աշխատանքի չմնան և 3000 դրամանոց բարեգործության կարիք չունենան»,-ասել էր Նազարյանը:

Պատասխանելով այս խոսքերին, Աբովյանն ասաց, որ իր մոտ տպավորություն է՝ ԱԺ դահլիճում ազվերին են ցպնել, քանի որ բոլորը գժված ինչ-որ բաներ են խոսում:

«Տիկին Նազարյան ջան, ես այն խմբակցությունից եմ, որը շատ է հարգում կին և տղամարդ տարբերությունը, դրա համար ինձ կպահեմ շատ կոռեկտ: Տիկին Նազարյան, երբ խոսում եք «Արարատ ցեմենտի» մասին, ինձ մոտ տպավորություն է, որ ուզում եք ինչ-որ խոսակցությունների, խաղերի, բարդույթների մեջ ներքաշել: Իրավական երկիր է, չէ՞: Բա դիմեք դատարան, յա: Մենք ենթադրում ենք, քաղաքական միտինգ...կես միլիոն մարդկանց մասին մտածեք, որ այսօր անգործ են, իրենց մասին մտածեք, ոչ թե դուրս եկեք ասեք՝ մենք ենթադրում ենք: Ես էլ լիքը բան եմ ենթադրում»,-ասաց Աբովյանը:

Անդրադառնալով 3000 դրամի բարեգործությանը՝ ԲՀԿ քարտուղարն ասաց. «Արեք այնպես, որ մարդիկ չունենան այդ տոպրակների կարիքը, բայց քանի դեռ ունեն 100 տոկոս դրանք ստանալու են, 100 տոկոս»:

Աբովյանը բարկացած ասաց, որ իշխանությունն իրենց բիզնես շահերը պաշտպանող խմբակցություն է կոչում. «Դե հիմա մի հատ օրինակ բերեք, որ մենք բիզնես շահեր ենք պաշտպանում: Չեք կարող»:

ԱԺ փոխնախագահ Ալեն Սիմոնյանն Արման Աբովյանին հիշեցրեց, որ իր խոսելու համար հատկացված ժամանակը սպառվել է. «Ազվերինից եք խոսում, բոլորից բեթար ազվերին եք անում»:

Աղբյուր` Փաստինֆո