Փաստ ինֆո

Ազատի ջրամբարից 5,6 մլն խորանարդ ջուր է բաց թողնվել Արաքս, իսկ բնակիչները ջուր չունեին ոռոգման համար։ Այս մասին հրավիրված մամուլի ասուլիսին ասել է «Հանրային վերահսկողության կենտրոն» ՀԿ ղեկավար Բաբկեն Հարությունյանը։ 

Նա արձանագրեց, որ խոսքը մի տարածաշրջանի մասին է, որի բնակչությունը բողոքում էր, թե իրենց ջուր չեն տրամադրում, հողը ոռոգելու խնդիր կա և այս պարագայում նոյեմբերին այդքան ջուր է բաց թողնվում Արաքս գետ, ինչի վերաբերյալ հարցում է ուղարկվել Ջրային կոմիտե՝ հասկանալու, թե ինչու է ջուրը բաց թողնվել:

«Աբսուրդ պատասխան էին տվել, թե այնտեղ որոշակի աշխատանքներ իրականացնելու համար ստիպված են եղել ջուր բաց թողնել: Հիմնավորել էին, թե գյուղացիների պահանջները բավարարել են, իբր ջուրն ավելցուկ է տվել, իրենք էլ բաց են թողել: Հարցրեցինք՝ ուր են գործընթացի ավարտական ակտերը, ասացին՝ սեպտեմբերին կավարտենք: Հիմա գարուն է, ջրամբարում ջուր է լցվում, ի՞նչ հիմնավորմամբ եք բաց թողել, ո՞վ պետք է սրա պատասխանը տա: Հերիք չի՝ գյուղացին խ/մ ջուրը գնում է 11 դրամով, իսկ ջրօգտագործող ընկերություններն այդ ջուրն առնում են 1 դրամով, մի հատ էլ պետությունը ջրօգտագործողներին տարեկան 5 մլրդ դրամի սուբսիդիաներ է տալիս: Սա ի՞նչ բիզնես է»,- ասաց Հարությունյանը՝ հավելելով, որ այս ամենը մեկ նպատակ ունի՝ անխնա լափել առկա ֆինանսական միջոցները:

Նրա խոսքով՝ Դատախազությունն այս ոլորտում գտել է ընդամենը 3,6 մլրդ դրամի թալան և 1 դրամ անգամ չեն վերադարձրել՝ չնայած դատախազը խոստացել էր, որ բոլոր այդ գումարները վերադարձվելու են:

«Հիմա հարց է առաջանում՝ մեծ-մեծ բաներից խոսող իշխանություններն ինչու՞ չեն բարեփոխում այս համակարգը, ուզում են անընդհատ փող տանելու պրոցեսը լինի՞: Դրա պատճառն էլ կա. այսօր ՋՕ-ում, Ջրային կոմիտեում Պապիկյան Սուրենի ընկերներն են պաշտոններ զբաղեցնում, նրանք զրո պատկերացում ունեն համակարգի մասին»,- ասաց Հարությունյանը:

Աղբյուր` Փաստինֆո