Փաստ ինֆո

Երեկ ՀՀ ոստիկանություն էին բերման ենթարկել քաղաքացի Միքայել Մարգարյանին, որը կառավարության շենքի մոտ եկել էր իր բողոքն արտահայտելու առ այն, որ իրեն ստիպում են վճարել կոմունալները: Քաղաքացի Միքայել Մարգարյանն այն վառ ապացույցն է, որ կառավարության հասցեական քաղաքականությունը տխուր և ողբալի վիճակում է: Այս մասին այսօր ԱԺ ամբիոնից ասաց «Լուսավոր Հայաստան» խմբակցության պատգամավոր Անի Սամսոնյանը:

Նրա փոխանցմամբ՝ Միքայել Մարգարյանն ու իր ընտանիքը զբաղվում են մշակութային միջոցառումներով, ունեն կազմակերպություն . «Մշակութային միջոցառումներ կազմակերպելու համար անհրաժեշտ է, որպեսզի հավաքվի 20 և ավելի մարդ: Արտակարգ դրության պայմանները ենթադրում են, որ չեն թույլատրվում նման հավաքներ: Միքայել Մարգարյանի գործունեությունը ենթադրում է, որ պետք է բաց լինեն ռեստորանները, սրճարանները , համերգասրահները, բոլոր այն բազմամարդ վայրերը, որտեղ նա կարող է կազմակերպել մշակութային միջոցառումներ»:

Սամսոնյանն ընդգծեց, որ Կառավարությունը որոշել է, որ արտակարգ դրությունը չի ազդել Մարգարյանի սոցիալական վիճակի վրա ու նրան չի ներառել շահառուների ցանկում. «Հավատացեք, նա միակ քաղաքացին չէ: Նրա բիզնեսը՝ որպես տեսակ, միակը չէ, որի վրա արտակարգ դրությունն ազդեցություն է ունեցել: Կամ ՀՀ Կառավարությունում լավ չեն պատկերացնում տնտեսական գործունեությունների ամբողջական շղթան, կամ լավ չեն աշխատում»:
Անդրադառնալով պատգամավորներից Հովհաննես Իգիթյանի դիտարկմանը, թե սխալ է ասել, որ ժողովուրդը սոված է և պետք է գումար տալ, քանի որ ժողովրդի մի մասը սոցիալական խնդիրներ ունի և կառավարության պարտքն է հայտնաբերել այդ մարդկանց, Անի Սամսոնյանն ասաց. «Պարոն Իգիթյան, Դուք ու՞մ հետ եք շփվում: Գործարարների՞, քաղաքական գործիչների՞...այսպիսին է իրավիճակը, բոլոր պատերազմների ժամանակ, աղետների, համաճարակների ժամանակ ժողովուրդը սովում է: Մարդիկ զրկվել են իրենց աշխատանքից , բնակչության հիմնական մասը զրկվել է աշխատանքից: Ես և Դուք չենք զրկվել, դրա համար Ձեր ձայնը տաք տեղից է գալիս»:

Անդրադառնալով «Իմ քայլը» խմբակցության պատգամավոր Բաբկեն Թունյանի հայտարարությանը, թե ոչ ոք չի սովելու, Սամսոնյանն առաջարկեց, որ Թունյանը հրապարակի իր հեռախոսահամարը ու այդ դեպքում սննդի կարիք ունեցող այնքան մարդ կզանգահարի, որ նա կզղջա իր ելույթի համար:
«Հաջորդ անգամ, երբ որևէ քաղաքացու, կամ օրինակ Միքայել Մարգարյանին բերման կենթարկեն ոստիկանություն, հարգելի իշխանության պատգամավորներ գնացե՛ք նրա հետևից ու նրան բացատրեք ձեր հասցեականության քաղաքականությունը: Չմոռանաք նաև ձեզ հետ տանել փոխխոսնակ և մարդկանց 100 հազար դրամ աջակցությունն էժան պոպուլիզմ համարող Ալեն Սիմոնյանին, որպեսզի նա էլ բացատրի: Չնայած, գիտեք ինչ, կարող եք չտանել, որովհետև նրան նույնիսկ սեփական թիմում լուրջ չեն ընդունում, ուր մնաց մենք և ժողովուրդը լուրջ ընդունենք»,-ամփոփելով խոսքն ասաց ԼՀԿ խմբակցության պատգամավորը:

Աղբյուր` Փաստինֆո